Енді зейнетақының ақшасына несиенің негізігі қарызын жабуға болады

Енді зейнетақының ақшасына ипотеканың пайызын төлеуге жол берілмейді. Өнеркәсіп министрлігі тиісті заң жобасын әзірледі. Ол күшіне енсе, бұдан былай зейнетақы қорынан шығарылған қаржыға баспана несиесінің негізгі қарызы жабылады. Ал оның халыққа пайдасы қандай? Экономистер не дейді? Тақырыпты әріптесім Оразай Нұртайұлы жалғастырсын. ОРАЗАЙ НҰРТАЙҰЛЫ, тілші: Зейнетақыға енді ипотеканың негізгі қарызы жабылады. Өнеркәсіп министрлігі жинақтың тиімділігін арттыру үшін осындай бастама ұсынды. Ведомство өкілдерінің айтуынша, бұл өзгерістің нәтижесінде несиенің мерзімі де, ай сайынғы төлемі де қысқармақ. Мысалы, сіз Бірыңғай жинақтаушы зейнетақы қорынан артылған 2 миллион теңге шығарып алдыңыз, ал ипотекаңыздың негізгі берешегі 10 миллион теңге дерлік. Жинақтан алынған ақша дәл сол несиеге төленіп, нәтижесінде сіздің негізгі қарыз 8 миллион теңгеге төмендейді. ДАУБЕК КЕРІМБАЕВ, ҚР Өнеркәсіп және құрылыс министрлігі басқармасының бас сарапшысы: Бір бөлігі пайыз жапса, бір бөлігі негізгі борышты жапқан. Яғни, біржолғы зейнетақы төлемдерін алушының сомасы толықтай негізгі борышты өтемегеннен кейін қолдану барысында қатты сезілмеген. Министрлік өкілінің айтуынша, зейнетақыдан алынған ақша бұған дейін ипотеканың негізгі қарызынан гөрі, көбіне пайызды өтеуге жұмсалған. Содан нәтижесі көрінбей, шағым көбейді дейді маман. Ал экономистер жалпы зейнетақыдан ақша алғанды құптамайды. АРМАН БАЙҒАНОВ, экономист: Тұрғын үй жағдайын жақсартқаны жақсы. Алайда ол жинақ болашақта керек болатынын ескерген жөн. Қордағы артылған қаржыны қазіргі қажеттіліктер үшін шеше берген дұрыс емес. Ал халық зейнетақыдан алынған қаржының пайызды емес, қарыздың өзін өтегенін құптайды. Алайда өзгерістің қызығын тек табысы жоғары азаматтар ғана көреді деген пікірде. Айта кетсек, қазақстандықтарға зейнетақы қорындағы жеткілікті шектен асқан соманы шешіп алуға 2021 жылдан бастап рұқсат берілген еді. Жинақтағы ақшаны медициналық қызметке немесе баспанаға жұмсауға рұқсат берілген. Айта кетсек, қаңтардан бастап зейнетақы қорынан шешілген ақша табыс салығынан босатылады. #Информбюро #31арна #БастыЖаңалықтар #Новости #31канал