Белгісіз біреулер мектепте қанды қырғын саламыз деп елді дүрліктірді

Мектептерде қанды қырғын саламыз! Телеграм арнасы арқылы тараған бұл хабарлама ақтаулық ата-аналарды дүрліктіріп қойды. Тіпті теракт ұйымдастырамыз деген қаскөйлердің жазбасынан қорқып қалған көп балаларын мектепке жібермей қойған. Ал жағдайды бақылауға алдық деген полиция жұртты жалған ақпаратқа сенбеуге шақырады. Күдіктілер ұсталды ма? Қауіп сейілді ме? Әріптесім Махаббат Нұржанқызы біліп келді. Мектептерде қантөгіс жасаймыз дегендер беттерін тұмшалап, әлеуметтік желі арқылы қайта-қайта хабарлама жолдады. Қарудың суретін салып, білім ошақтарын тізбектеген қаскөйлердің жазбасы жексенбіде шыққан. Бірден оқу орындарын тексерген полицейлер қауіп жоқ деп бірден көптің қорқынышын сейілтуге тырысқан еді. Бірақ құзырлы органның ресми мәлімдемесіне сенгендер аз болды. Расыменде, әдетте азан-қазан болып жататын мектептерде бүгін тыныш. Оқушылардың дені сабаққа келмей, сыныптар бос қалған. Тіпті мұғалімдер баланың аздығынан кей сыныптарды үйлеріне жіберіпті. МҮСІЛІМ ШАҢЫҚҰЛОВ, Ақтау қаласының тұрғыны: Екеуін апарған жоқпыз. Орысша айтқанда рисковать етпей-ақ қояйық деп қасымызда үйде болсын дегендей. Әрине үрейленесің, ешкім гарантия жоқ қой қазір не болатынына. Білім бөлімінің өкілдері "мектептерде қырғын саламыз" деген хабарлама арандату мақсатында жарияланғанын жұртқа түсіндіре алмай қиналдық деп отыр. Тұрғындардың шошып қалғаны сонша бірінші және екінші ауысым бойынша оқушылардың тек 43 пайызы ғана мектепке келген. Мамандар халықты дүрбелеңге салынбай, балаларды білім алуға жіберуді сұрайды. АЙБАРШЫН ӨТЕСБАЕВА, Ақтау қалалық білім бөлімінің басшысы: Қазіргі таңда осы жалған ақпарат таратқандарды анықтау бағытында іздестіру жұмыстары жүргізілуде. Қазіргі таңда Ақтау қаласында барлық білім беру ұйымдарында оқу-тәрбиелік процесі бұрынғыша өтіп жатыр. Ата-аналарға айтарымыз балаларыңызды қорықпай мектепке жіберуді сұраймыз. Ал, полиция лаңкестік әрекет ұйымдастырамыз деген күдіктілерді анықтау өте қиын екенін жасырмайды. Себебі, олар шетелде отырып та жалған ақпарат таратуы мүмкін. Айта кетейік, жыл басынан бері өзге қалаларда да осыған ұқсас хабарламалар тарап, талай мәрте ата-аналардың зәресін алған болатын. #Информбюро #31арна #БастыЖаңалықтар #Новости #31канал