Әлімжеттік құрбаны ма? 15 жастағы жеткіншектің денесі зират маңынан табылды

Түркістанда тағы да оқушы өлімі тіркелді. Жамбыл Жабаев атындағы мектепте білім алған 15 жастағы жеткіншектің денесі зират маңынан табылған. Марқұмның туыстары ұлымыз әлімжеттіктің құрбаны болғанына сенімді. Қайғыдан қан жұтқан отбасы тоғызыншы сыныптың оқушысын ақша бермегені үшін қатарластары тепкінің астына алған. Жүрек тұсынан алған ауыр соққыдан Мейіржан Нұржанұлы оқиға орнында жап тапсырды деп отыр. Мән-жайды әріптесім Нәзерке Үкібасова біліп келді. Несіпгүл Тұтқабекова арқалап өсірген немересін өткен аптада жер қойнына тапсырған. Қаралы күнді егіліп отырып еске алған әжесі 9-сынып оқушысын достары кешке қарай сұрап алып кеткенін айтады. Сол кеткеннен оралмаған жеткіншектің жансыз денесі мола маңынан табылыпты. БАУЫРЖАН НҰРЖАНҰЛЫ, марқұмның ағасы: Бұлар 34 баланы қойып қойған шеттерінен. Сөйтіп жаңағы төртеуі ұрып шыққан ғой. Екі рет айналдырып шыққан 4 бала. Екі удардан есептегенде 8 удар екен. Менің інімнің жүрегінен ұра берген. Тек жүректен ұрған. Жүрегінен ұра берген соң сол жерде тоқтап қалған жүрегі. Жүрегі жарылып кеткен. Ұйқы безі езіліп кеткен. Ол да жарылып кеткен. Сол кезде на месте кеткен. Мейіржан Нұржанұлы үйіндегі үш баланың кенжесі. Ол өмірге келгенде әкесі бақилық болыпты. Анасы, әжесі мен ағасының тәрбиесінде өскен бала физика мен математикаға қызығушылығы жоғары еді дейді жақындары. Тіпті, қайғылы оқиғаға дейін талай жарыстың жеңімпазы да атаныпты. Ұлттық қауіпсіздік комитетінде жұмыс істеуді армандаған оқушы мектептегі әлімжеттік туралы ешкімге тіс жармады дейді туыстары. НЕСІПГҮЛ ТҰТҚАБЕКОВА, марқұмның әжесі: Бастық балдары айтады екен. Бүгін сағат пәлен уақытта 15 мың жина или 20 мың жина. Жағдай енді әр түрлі ғой. Біреуде бар, біреуде жоқ. Сол бір бала әкелмесе бәрін ұрып шығады екен. Осыдан 10 күн бұрын шай ішіп отырсақ мына жері көкпеңбек. Әй әшейін ұрып алдым дейді. Менің баламды қорқытып жүргеніне 3-4 ай болыпты. Марқұмның жақындары қаладағы бірнеше мектепте түрмедей тәртіп орнатқан бұзақылар бар деп отыр. Олар ара-тұра балаларды зират жаққа жинап, ақша бопсалайды. Айтқанды орындамаған оқушыларды соққыға жығады дейді. Мейіржан оқыған Жамбыл Жабаев атындағы мектепке бардық. Бірақ ұстаздар ақпарат беруден бас тартты. Балалар омбудсмені Динара Закиева тексеріс жүргізіп, мән-жайды анықтаймыз деп сендірді. ДИНАРА ЗАКИЕВА, ҚР Бала құқықтары жөніндегі уәкіл: Қазіргі таңда қылмыстық іс тіркелді. Сол себепті қосымша ақпаратты беруге болмайды. Тексеріс жүргізіп, мән-жайды анықтаймыз. Қара жамылған отбасы 15 жастағы жасөспірімді ажал құштырған қатігез құрдастары жазасыз қала ма деп қорқады. Сондықтан тергеудің әділ өтуін, күдіктілердің толық қамалуын талап етеді. Түркістан облыстық полициясына сұраныс хат жолдадық. Жауабын алдағы шығарылымдарда көрсетеміз. #Информбюро #31арна #БастыЖаңалықтар #Новости #31канал