Ұлдары әскерде көз жұмған ата-аналар министрлік алдына жиналып, талаптарын жеткізді

Сарбаздардың аналары Астанада жиналды. Қорғаныс министрлігінің алдына келген бір топ әйел әскерде қаза тапқан ұлдарының өліміне әділ тергеу жүргізуді талап етті. Айтуларынша, істің көбі «өз-өзіне қол жұмсады» деп жабылып қала береді. Сондай-ақ қазақ армиясына жаңа реформа енгізуді ұсынды. Яғни, енді әскерге азаматтар 18 емес, 25 жастан шақыртылуы тиіс деп санайды. Және олар Отан алдындағы борышын келісімшарт арқылы өтесін деген тілектерін де жеткізді. Қорғаныс министрлігінің алдына жиналған аналардың арасында әскерге кеткен ұлын жер қойнына тапсырғандар да, баласын төсекке таңылған күйде бағып отырғандар да бар. Сол себепті көпшілік қаза тапқан немесе мүгедек болып қалған сарбаздардың отбасына мемлекет тарапынан өтемақы төлену тиіс дейді. ГҮЛМИРА МҰҚАЖАНОВА, Астана қаласының тұрғыны: Баланы аяққа тұрғызу, қалпына келтіруге жететіндей қаржы бөлінсін. Біз соны талап етеміз. Бірақ бұлар міне Щучинск қаласынан реабилитациялық орталық аштық дейді. Бірақ ол жерге барайын десек, ол жерде түк те жоқ дейді. Тағдыры ұқсас тағы бір ана – Сәуле Тілеубергенова. Әскерге өз еркімен кеткен Қайсары небәрі үш айдан соң үйіне табытпен оралған екен. Іс «өз-өзіне қол жұмсады» деген қорытындымен жабылған. Бірақ анасы бұған сенбейді. Ал бүгін Астанаға ауыр жүк арта келген әйелдер осындай күмәнді істерді қайта сараптамадан өткізіп, ашық әрі әділ тергеу өткізсе деп отыр. СӘУЛЕ ТІЛЕУБЕРГЕНОВА, Алматы қаласының тұрғыны: Екі рет атылған. Бірінші атылғаннан бәрі миы бәрі ұшып кеткен. Ал, 6 минуттан кейін екінші рет атылған. Одан басқа тағы дәлелдейтін менде материалдар бар. Жаңағы бейнежазбалар бар сарбаздар берген. 105-бабтан 99-бабқа ауыстырсын. Убийство. Соны мен талап етемін. Ал қорғаныс министрлігінің мамандары бүгін ата-аналарды қабылдап, әр шағым жеке қаралатынын айтты. Ведомство өкілдері моральдық-психологиялық бақылауды күшейтіп, әскери бөлімдерде бейнебақылау мен жасанды интеллект жүйесін енгізу жоспарда бар дейді. ТІЛЕУХАН БАСҚОЖАЕВ, ҚР Қорғаныс министрлігі тәрбие және идеологиялық жұмыстар департаментінің бастығы : Суицидттің алдын алу және қаруға қол жеткізуді бақылау үшін жасанды интеллект элементері бар бейнебақылау енгізілуде. Қоғамдық ұйымдармен оның ішінде «Сарбаз аналары» комитетімен ынтымақтастық жүйелі жолға қойылған. Министрлік ата-аналар мен ашық диалогқа үнемі дайын және әрбір жағдайды обективті қарайтынын алға тартамыз. Министрлік мәлімдемесіне сүйенсек, енді сарбаздардың психологиялық жағдайына тұрақты мониторинг жүргізіліп, жауынгерлердің қауіпсіздігіне баса назар аударылады. Ал аналардың тілегі әскердің ішінде әділдік орнату. #Информбюро #31арна #БастыЖаңалықтар #Новости #31канал