«Сен маған ұнайсың». Алматыда 13 жастағы қызды қырындаған ер адам жұрттың жағасын ұстатты

Алматыда сұмдық жағдай. Белгісіз ер адам сабақтан шыққан 13 жастағы қызға қырындап, бірге қыдырмақ болған. Тіпті қаршадай балаға сезімін білдіріп, ақша беремін деп баурағысы келіпті. Әуелі 100, артынша 300 мың теңге аласың деп жеткіншекті көндірудің амалын жасаған. Мектептің дәл іргесіндегі аялдамада болған жайтты оқушы қыз видеоға түсіріп алған. Әлеуметтік желіде тараған бейнежазбада аялдамада отырған ер адам оқушыны бірнеше мәрте көндіруге тырысқанын көруге болады. Жеткіншек полицияға шағымданатынын ашық жеткізсе де, ер адам тоқтай қоймаған. Балалар құқығын қорғау комитетінінің хабарлауынша, оқиға қарашаның тоғызы Алматыдағы нөмірі 50-ші мектептің маңында болыпты. Бүгінде мамандар 13 жастағы қыздың анасымен байланысып, тиісті көмек көрсетіліп жатыр екен. Ал оқушының мазасын алған күдіктіні полиция анықтап, қолға түсірді. Оған әкімшілік іс қозғаған. САЛТАНАТ ӘЗІРБЕК, Алматы қаласы полиция департаментінің ресми өкілі: Өзі жергілікті тұрғын болып шықты. Мас күйде болған екен. Өз кінәсін мойындады. Қазіргі таңда ол кісі әкімшілік қамауға алынды. Соттың шешімімен 10 тәулікке қамау көзделген. #Информбюро #31арна #БастыЖаңалықтар #Новости #31канал