Бес жыл бойы күйеуінен қорлық көрген әйел мүгедек болып қалды

Петропавлда бес жыл бойы күйеуінен қорлық көрген әйел мүгедек болып қалды. 38 жастағы келіншектің озбырлықтың кесірінен миына қан құйылып, эпилепсияға шалдыққан екен. Тиран жолдасының жұдырығынан әбден зәрезап болған тұрғын «бас жарылса бөрік ішінде» деп шыдап келгенін айтады. Алайда атпалдай азамат туған балаларына қол көтеруді жиілеткенде бірден полицияға шағымданыпты. Бірақ тәртіп сақшылары әкімшілік іс қозғап, күдіктіні бар болғаны алты тәулікке қамағаны ақылға қонымсыз деп отыр. Күйеуінен көрген қорлығы есіне түссе Тамараның тұла бойы шымырлайды. Жағы сынып, бет-аузы көгерген келіншек жүзін көрсетуге ұялады. Ол соңғы бес жылым азаппен өтті деп қынжылады. Сүйіп қосылған жарым есірткіге тәуелді болған күннен бастап себепсіз ұрып-соғатынды әдетке айналдырды деп отыр. Соңғы рет қылқындырып, басынан тепкенде ауруханадан бір-ақ шығыпты. ТАМАРА ВАСИЛЬЕВА, Петропавл қаласының тұрғыны: Соңғы рет бір апта бұрын тепкінің астына алды. Аямай жұдырықтады. Содан кейін инсульт алдым. Эпилепсияға шалдығып, үшінші топтағы мүгедек болып қалдым. Бала-шағамды алып, анамның үйіне қашып кеттім. Мен күйеуімнен қорқып, ешкімге тіс жармай жүрдім. Ол мұны пайдаланып, білгенін істеді. Ары қарай шыдай алмаймын. Жәбір көрген әйелдің айтуынша, тиран күйеуі туған бес баласына да күн көрсетпей екен. Қыздарды жұлқылап, ұлдарды жиі ұруды шығарды дейді. Отбасындағы озбырлық шегіне жеткен соң келіншек ақыры полицияға арыз жазыпты. Бірақ тәртіп сақшыларының әкімшілік іс қозғағанын түсіне алмай дал. ТАМАРА ВАСИЛЬЕВА, Петропавл қаласының тұрғыны: Еш себепсіз ұл-қыздарыма да қол көтере бастады. Балаларымды алып кетейін десем, ажырасуға да келісімін бермейді. Қазір күйеуімді алты тәулікке қамапты. Босап шыққан соң ол мені тірі қалдырмайды. Сондықтан түрмеден шығармасын. Қылмыстық жауапкершілікке тартылсын. Балалардың ең кішкентайы төртте, үлкені 17 жаста екен. Тәртіп сақшылары арыз түскен соң бірден әйелдің үйіне барып, күдіктіні қамадық дейді. Іс материалдары қазір сотқа жолданыпты. ҚАЙЫРБЕК БАЙМОНКЕНОВ, Петропавл қаласы полиция басқармасы бастығының орынбасары: Әйел күйеуінің тарапынан жасалған құқыққа қайшы әрекеттер бойынша арыз жазды. Оған қатысты әкімшілік іс қозғалды. Қазіргі уақытта сот шешімі шыққанға дейін ол уақытша ұстау изоляторына қамалды. Қосымша тексеру шараларының нәтижесі бойынша соңғы процессуалдық шешім қабылданатын болады. РУСЛАН ЖАСҰЛАНҰЛЫ, тілші: Қазір тұрмыстық зорлық-зомбылықтың құрбаны болған Тамара мен бес баласына психологтар көмек көрсетіп жатыр. Озбырлықтан опық жеген әйел 17 жыл бұрын отасқан күйеуімен ресми түрде ажырасуға бекініпті. Ол қатыгез әкені заң бойынша жазалап, ата-ана құқығынан айыру керек деп отыр. #Информбюро #31арна #БастыЖаңалықтар #петропавл #31канал