Сайт использует сервис веб-аналитики Яндекс Метрика с помощью технологии «cookie». Пользуясь сайтом, вы даете согласие на использование данной технологии.
19. Тағдырды мойындамайтындар туралы. Ибн Омар (р.а.) былай деді: «Ибн Омардың жаны қолында болған Алламен ант етемін, егер олардың біреуінде үлкендігі Ухуд тауындай алтыны болып, содан соң оны Алла жолында жұмсайтын болса, Алла оны тағдырға иман келтірмейінше қабыл етпейді. Содан соң пайғамбардың صلى الله عليه وسلم сөзін дәлел ретінде келтірді: “Иман дегеніміз – Аллаға, Оның періштелеріне, кітаптарына, елшілеріне, Ақырет Күніне иман келтіру, және тағдырдың жақсылығы мен жамандығына иман келтіру”». Хадисті Муслим жеткізген. Убада ибн Сомит баласына былай деп айтқан: «Балам, сен басыңа келген нәрсенің тимей өтпейтінін, ал тимей өтіп кеткен нәрсенің келмейтінін білгенге дейін иман дәмін таба алмайсың. Мен Алланың елшісі صلى الله عليه وسلم мына сөздерді айтқандығын естігенмін: “Расында Алланың бірінші жаратқаны қалам еді. Ол оған (Алла қаламға): «жаз», – деді. Қалам: «Иә Раббым, не жазайын?», – деді. Алла Тағала: «Қиямет Сағаты басталғанға дейін тағдыр етіп бекітілген нәрсенің барлығын жаз», –деді”. Балам, мен Алланың елшісі صلى الله عليه وسلم мына сөздерді айтқандығын естігенмін: “Кімде-кім бұдан басқа сеніммен өлсе, онда ол менен емес”».Хадисті Тирмизи жеткізген. Ахмад “Муснадта” және Әбу Дәуд “Сунанда” Ибн Дәйләмидің былай деп айтқан сөзін келтіреді: «Мен Убай ибн Кағбқа келіп: “Менің ішімде тағдырға күмәндануға итермелейтін бір нәрсе бар. Маған бірдеме айтшы, мүмкін, Алла мұны менің жүрегімнен алып тастар”, – дедім. Сонда ол былай деді: “Егер де сен (садақаға) Ухуд тауындай алтын жұмсайтын болсаң, Алла оны сенен тағдырға иман келтірмейінше қабыл етпейді. Және басыңа келген нәрсенің тимей өтпейтінін, ал тимей өтіп кеткен нәрсенің басыңа келмейтінін біл. Ал бұдан басқа сеніммен өлгеніңде, тозақ иелерін болар едің”.Ибн Дәйләми: “Содан кейін мен Ибн Масғудқа, Хузейфа ибн Яманға, Зейд ибн Сабитке бардым. Олардың бәрі де пайғамбардан صلى الله عليه وسلم соған ұқсас әңгімені айтып берді”. Хадисті Хаким жеткізген, және оны өзінің сахих хадистер жинағында келтірген.
