Азия чемпионатынан жеңіспен қайтып келе жатқан үш студент жол апатынан қайтыс болды

Абай облысында Азия чемпионатына қатысып, жеңіспен қайтып келе жатқан үш студент жантүршігерлік жол апатынан қайтыс болды. Жас спортшылардың жаттықтырушысы да жарақат алып, ауруханаға жеткізілді. Марқұмдардың барлығы бір университетте оқыған екен. АЗАМАТ АЗАТОВ, Әлихан Бөкейханов университетінің проректоры: Азия чемпионатына қатысады деген шақырту хат келген университетке. Сол шақырту хат негізінде ресми бұйрық шығарып, сабақтан ол студенттерді босатқан болатынбыз. Чемпионатқа барып қатысып, студенттердің біреуі тіпті Азия чемпионы дәрежесіне қол жеткізіп жеңіс тұғырынан көрінген болатын. Бірақ бирман боксынан алтын алған Нұрмағанбет Тұрарбеков отбасымен қуанышын бөлісе алмай өмірі қыршыннан қиылды. Екі күн бұрын Жыланды ауылының маңында студенттер отырған Toyota Avensis маркалы машинасы қарсы бағытқа шығып, жүк көлігімен соқтығысқан еді. Апаттан машиналардың сау-тамтығы қалмай қираған. Көліктің рөлінде жас спортшылардың бірі отырыпты. Қаза тапқандардың екеуі заң факультетінің, ал біреуі биотехнология мамандығының студенті екен. Олар Астанада бирман боксынан өткен Азия чемпионатында бақ сынаған. Бүгін Абай өңірінде ажал құшқан екі жас жігітті туыстары жер қойнына тапсырды. Түркістан облысының тумасын жақындары ауылдарына алып кетті. Ал, жол көлік оқиғасынан аман қалған 26 жастағы жаттықтырушы Әлихан Бөкейханов университетінің төртінші курс студенті екен. Науқастың жағдайын дәрігерлер тұрақты дейді. Ал, жүк көліктің жүргізушісі жеңіл жарақат алған. БАЗАР ТӨЛЕУОВ, Абай облыстық жедел медициналық жәрдем ауруханасының бөлім меңгерушісі: Осы науқаста іштің жабық тұйық жарақаты деген диагнозбен науқас операцияға алынды. Операция кезінде көкбауыры жыртылған, іш-қуысына қан кетіп, қансырау болып жағдайы мүшкіл болды. Қазіргі кезде науқастың жағдайы жақсарып келе жатыр. Оң динамика бағаланады. #Информбюро #31арна #БастыЖаңалықтар #Азиячемпионаты #31канал