Енді күнделікті ішіп жүрген түрлі сусындардың босаған пластикалық бөтелкесінен пайда таба аласыз. Елде тұрғындардан пластик шөлмектерді сатып алатын фандоматтар орнатылмақ. Осылайша, Қазақстанның қаптамашылар қауымдастығы әр жерде шашылып жататын пластик қалдықтарды азайтып, экологияны жақсартуға үлес қоспақ. Және пластик қалдықтарды қайта өңдеу деңгейін 60 пайызға дейін жеткізуге уәде беріп отыр. Дәурен Молдабаевтың күнделікті тұтынған ас-судан шыққан қалдықты сұрыптап, жинап жүргеніне жарты жыл болған. Ол бұл әдетті жұбайынан үйренгенін айтады. Сөзінше, түрлі картон қораптарды, пластик ыдыстарды көлігінің артына ерінбей жинап, аптасына бір рет осындай эко станцияға алып келеді. Осы үшін қоқыс қабылдайтын орталықтан арнайы бонустар алады екен. Дегенмен Дәуреннің өзі қалдықтарды таза қалада өмір сүру үшін сұрыптаймын дейді. ДӘУРЕН МОЛДАБАЕВ, тұрғын: – Біз осы әдетімізбен өзіміз өмір сүретін қоршаған ортаны таза ұстауға және кейбір қоқыс түрлеріне екінші өмір беруге үлес қосамыз. Яғни, өзімізден қалған пластик бос бөтелкелерді, қағаз-картондарды сұрыптап жәшіктерге әкелеміз. Ол қоқыс әрмен қарай қайта өңделіп, кәдеге жарайды. Мұндай сұрыпталған қоқыстарды қабылдайтын орындар әзірге мегаполистерде ғана кездеседі. Қалдықтарды сұрыптау компаниясының мамандары, мұндай эко станция көптен бері пайда болса да халықтың мәдениеті енді ғана қалыптасып келе жатқанын айтады. Олар сұрыпталған қоқыс үшін тұрғындарға түрлі ынталандыру бонустарын береді. Ал ол бонусты пайдалы заттарға алмастыруға болады. АРЫСТАН БАЛТАБАЙ, «Экостен» қалдықтарды сұрыптау компаниясының өкілі: – Біз демалыссыз жұмыс істейміз. Өйткені адамдардың көбі қоқысты сұрыптап салуға тек демалыс күндері ғана келеді. Осы күндері бір тоннадай қалдық жиналады. Жұмыс күндері бес жүз келі жиналады. Қоқыстың ішінде макулатура мен пластик жиі кездеседі. Енді елде сұрыптау қоқыс жәшігінен бөлек, пластикалық бөтелкелерді қабылдайтын фандоматтар пайда болмақ. Әзірге бұл мегополис тұрғындары үшін қолжетімді болады. Қалдықтарды қайта өҢдеуші компания, мыңға дейін автомат сатып алып, халық көп жиналатын жерлерге орнатуды жоспарлап отыр екен. Бірақ, әкімдіктер қолдап жатса, фандоматтар саны ел бойынша артады дейді. Фандомат әр пластик бөтелке үшін 3-5 теңге беретін болады. ӘДІЛЕТ НҰРСЕЛИНОВ, «Еcoplatform» ЖШС директоры: – Бұл фандомат деп аталады. Мына жерге бутылка шөлмек салынады пластмасса салынады, одан кейін мына жерде чек шығады. Бұл чекті біздің қабылдау пункттерінде обналичивать етуге болады. Мынау құрылғы Еуропада қойылды. Кореяда қойылды. Қазір мынау біздікі Росииянікі. Ресей мемлекетіне 1 жарым жыл болды осы фандоматтар қойылды. Мынау Қазақстандағы ең бірініші фандомат. Қазақстанда жылына 90 мың тонна пластик қалдықтары жиналады екен. Экология министрлігінің мәліметінше, соның тек 3,5 пайызы ғана қайта өңделеді. Ал осыдан екі күн бұрын Қазақстан аумағынан пластик қалдықтарды шығаруға тыйым салынды. Диана Сапарқызы Бізді әлеуметтік желіде оқыңыздар: Youtube - / @informburo31kanal Facebook - / informburo31 Instagram - / informburo31 Vkontakte -
https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #экология #пластикалықбөтелкелер #қабылдау
