Қазақстан мен АҚШ құны 17 миллиард доллардан асатын келісімдерге қол қойды

Қазақстан мен АҚШ құны 17 миллиард доллардан асатын келісімдерге қол қойып, өзара серіктестікті жаңа деңгейге көтерді. Құжаттар өнеркәсіп, энергетика, цифрландыру, білім беру және инновациялар секілді негізгі бағыттарды қамтиды. Барлық маңызды келісімдер екі ел басшыларының жеке жүздесуінде шешілген. Дональд Трамптың Қасым-Жомарт Тоқаевты Ақ үйге өзін ғана шақыруының сыры неде? АҚШ президенті нені көздеп отыр? Жалпы Вашингтондағы сапар бойынша әріптестерім кеңінен тоқталады. Дональд Трамп Қасым-Жомарт Тоқаевпен Ақ үйдің төрінде жолықты. Кездесу барысында мемлекет басшысы Трамптың Таяу Шығыста бейбітшілік орнату жолында нақты қадамдар жасап, елеулі нәтижелерге қол жеткізкенін атап өтті. Осыдан кейін көшбасшылар Израиль премьер-министрі Биньямин Нетаньяхумен телефон арқылы байланысқа шықты. Әңгіме Қазақстанның «Ибрахим» келісімдеріне қосылуы төңірегінде өрбіді. AQORDA: Ибраһим келісімдеріне қосылу арқылы Қазақстан қақтығысты еңсеруге, диалогты ілгерілетуге және БҰҰ Жарғысы негізіндегі халықаралық құқықты қолдауға үлес қосады. Қазақстанның бұл шешімі ешбір мемлекетпен екіжақты қатынастардағы міндеттемелеріне нұқсан келтірмейді. Мемлекет басшысы Америка Құрама Штаттарымен стратегиялық серіктестікті одан әрі нығайтуға ниетті екенін атап өтті. Қазірдің өзінде елімізде 600-ден астам америкалық компания кәсібін дөңгелетіп отыр. Ал Қазақстан АҚШ-тағы уран сұранысының шамамен 25 пайызын қамтамасыз етеді. Соңғы жылдары екі ел арасындағы тауар айналымы екі есеге өсіп, 5 миллиард доллар межесіне жеткен. Енді осы сапар аясында қос тарап аса маңызды минералдар бойынша меморандумға қол қойды. AQORDA: Мемлекет басшысы Қасым-Жомарт Тоқаев Теңіз және Қарашығанақ кен орындарындағы мұнай мен газды игеру бойынша ауқымды жобаларды жүзеге асыруға Chevron корпорациясының қосқан үлесіне жоғары баға берді. Сондай-ақ Қазақстан тарапының шикізатты өндіру, өңдеу және тасымалдау салаларындағы өзара тиімді ынтымақтастықты жалғастыруға дайын екенін растады. Сонымен қатар, Қазақстан мен OpenAI компаниясы ортақ келісімге келді. Енді еліміздегі мектептер ChatGPT көмегімен сабақ өткізе алады. Компания алдағы үш жыл бойы педагогтарға жыл сайын кемінде 165 мың лицензия ұсынуға уәде берді. Бұл бастама Қазақстандағы білім беру саласында жасанды интеллект мүмкіндіктерін кеңінен қолдануға жол ашпақ. #Информбюро #31арна #БастыЖаңалықтар #Новости #31канал