Әр даудың нүктесін қоятын - сот | ⚖️ «Заң үстемдігі» қонағы - Амангелдин Айбек Темірұлы

⚖️ «Заң үстемдігі» YouTube арнасының қонағы - Астана қаласы мамандандырылған ауданаралық әкімшілік сотының судьясы Амангелдин Айбек Темірұлы әкімшілік әділет бойынша өз пікірімен бөлісті. Сұхбат барысында әкімшілік сот төрелігінің қазіргі жағдайы мен жетістіктері кеңінен талқыланды. Судьяның айтуынша, 2024 жылдың соңында республика бойынша істерді қанағаттандырудың орташа деңгейі 61%-ды құраған. Бұл – халықтың сотқа деген сенімінің артуының айқын көрсеткіші. Әсіресе, тұрғын үй, кеден және салық даулары бойынша істердің 70%-ы қанағаттандырылып отыр. Сот тәжірибесінде кәсіпкерлер мен азаматтарға кедергі келтіру фактілері азайып келеді. Судья азаматтар заңсыз әрекеттерін түсінген кезде, өз еркімен татуласуға ұмтылатын жағдайлардың көбейгенін атап өтті. Сондай-ақ жоғары лауазымды тұлғалар – облыс әкімдерінің орынбасарлары мен комитет төрағаларына қатысты ақшалай өндіріп алу шаралары қолданылғаны айтылды. Бұл – әкімшілік әділеттің заң алдындағы барша азаматтың теңдігін қамтамасыз етуге бағытталған нақты қадамы. Әкімшілік соттардың азаматтық соттардан басты айырмашылығы – олар өз шешімдерінің орындалу барысын бақылап отырады. Заңды күшіне енген сот шешімдерінің орындалуы сот назарында болады. ⚖️ «Заң үстемдігі» бағдарламасы. Бағдарлама жүргізушісі – Нұргүл ҚАРАҒОЙШИНА