1. Траст трейд компани үйлдвэрээс гарах мах, махан бүтээгдэхүүнийг гадаад зах зээлд нэвтрүүлэхтэй холбоотойгоор Веритек болон Ай Ти системс компаниудтай хамтран, бүтээгдэхүүний ул мөрийг мөрдөн тогтоох систем хангамжийг нэвтрүүлэх төслийг хэрэгжүүлж, үүндээ Экспортыг дэмжих төслөөс 50 мянган долларын буцалтгүй санхүүжилтийг авч ажиллажээ. 2. Монконди чихрийн үйлдвэр нь бүрэн автомат ажиллагаатай, GMP, ISO 22000 стандартыг хангасан тоног төхөөрөмжтэй бөгөөд Монгол улсын чихрийн зах зээлийн 15%, шоколадны зах зээлийн 10%, шоколадны кремны 20%, өтгөрүүлсэн сүүний 5% ийг хангах хүчин чадалтай. Дэлхийн банкны Экспортыг дэмжих төслийн дэмжлэгтэйгээр бүтээгдэхүүн хөгжүүлэлтийн асуудлаа амжилттай шийдвэрлэж, чихрийн нэр хаяг, сав баглаа боодол зэргийг олон зуун жилийн туршлагатай гадны мэргэжилтнүүдтэй хамтран, өөрчлөн сайжруулсан нь үр дүнгээ өгч дотоодын болон экспортын борлуулалт эрс сайжирчээ. 3. Шар доктор компани 2011 онд өдөрт 6 тонн чацаргана боловсруулах хүчин чадалтай шинэ үйлдвэрийг барьж ашиглалтанд оруулжээ. 2020 онд үйлдвэрийн хүчин чадлыг нэмэгдүүлж, тоног төхөөрөмжийн шинэчлэлт, өргөтгөлийн ажлуудыг хийж үйлдвэрийг бүрэн автоматжуулсан бөгөөд, мөн жимс хадгалах 500 тоннын хүчин чадалтай хөлдөөгч, хөргүүрийг ашиглалтанд оруулсанаар нийтдээ 1000 тонн жимс нөөцлөх боломжтой болсон байна. 2018 онд Хүнсний аюулгүй байдлын удирдлагын тогтолцоо ISO22000:2005 олон улсын стандартыг амжилттай хэрэгжүүлэн батламжаа авсан бол 2023 онд Хүнсний аюулгүй байдлын менежментийн тогтолцооны ISO22000:2018 олон улсын стандартыг дахин амжилттай хэрэгжүүлж энэ ажилдаа Дэлхийн банкны экспортыг дэмжих төслийн дэмжлэгийг авчээ.
