Түркістан облысы Қасқасу ауылының жұрты жайылымсыз қалдық деп отыр. Айтуларынша, ауыл маңында мал жаятын жердің көлемі осы бірер жылда 10 есеге қысқарып кеткен. Сондықтан ауылдағы төрт түлік ағаш дөңкесін кеміруге көшкен. Тау бөктеріндегі тұмса табиғатқа қызыққан бай-бағландар мен тіпті, шетелдіктер елге іргелес жатқан аумаққа қора-қопсы және демалыс аймақтарын салып тастаған. Соның кесірінен төрт түлігін аядай ғана ауласында бағып жатқан жұрт малымыздың күйі болмай кетті деп шағымданады. Ерлан Бексейітов екі үйір жылқысын үйінде ұстап отыр. Мал жаятын жайылымның жоқтығынан аттарын аядай ғана ауласына байлап қойған. Үнемдеп жем-шөбін беріп, тұяқтыларын өлтірмеудің қамын жасап бағуда. Ал қазіргі нарықта бір бау шөп 2 мың, ал бір келі жем 200 теңге төңірегінде тұратынын ескерсек, шаруашылығым шатқаяқтап тұр дейді. ЕРЛАН БЕКСЕЙІТОВ, Қасқасу ауылының тұрғыны: – Мынау артымызда тұрған жылқының өзіне күніне азанда 5 прес, кешке 5 прес шашамыз. Ал үйдегіге азанда 5 прес, түсте 5 прес, кешке 5 прес шашамыз. Мынау артымызда тұрған жабағылар жүдеу, көріп тұрсыз. Өйткені амал жоқ, шөп жетпейді. Көрдіңіздер қардың қалай түсіп жатқанын, ертең март, апрель айларында далаға шығарғанмен жайыла қоятын жайылымымыз жоқ. Тау бөктеріндегі тұмса табиғаттың аясында орналасқан ел жайылым жердің жоқтығына налиды. 10 жылдан бері ауыл маңындағы майса маңай тістегеннің аузында, ұстағанның қолында кетті деп отыр. Жайылымның игілігін шетелдіктер де иемденіп қалған дейді халық. Төрт ауылдың 4200 гектар жайылым қазір 10 есе қысқарыпты. Мал бағатын аумақты аукцион арқылы сатып, май шелпекке айналдырғандар осы өңірдің әкімдері мен ақ жағалылары деп отыр. ҚАЙРАТ БҮРКІТБАЕВ, Қасқасу ауылының тұрғыны: – Халық деген шығып жатыр, арабтар қоршап қойған кіргізбейді де ешқандай оны. Кемпингке дейін қоршап қойған, мынау Қасқасу өзені, Сайрам су, анау Сарыбұлаққа дейін сондай. ДОСМАХАН ДІЛДАХАНҰЛЫ, Қасқасу ауылының тұрғыны: – Жайылымдарымыздың бәрін бай-бағландар, турасын айтқанда, гектарлап-гектарлап алып қойған. Ауданға қайта-қайта барамыз, барамыз, жайылым деп, қанша жыл болды осы. ... Қазір Қасқасудағы өзен маңы бай-бағландардың демалыс орындары мен қора-қопсыларына айналған дейді жұрт. Зәулім коттедждер мен мұндалаған моншалар көп. Кейбірі қора аумағын қоршап, одан артылған бос аумақты да иемденіп алғанын айтады. Ауыл әкімінің есебінде осыны шырылдап айтқан жұртқа аудан басшылығы басу айтуға тырысты. ЛЕСБЕК СЕРІКБАЕВ, Төлеби ауданы әкімінің орынбасары: – Жайылым деген жерлерді сыртынан демалыс аймағы деп пайдаланып отырған фактілер болса, біз оны тиісті ауылдық округінен ұсыныс алдырамыз. Тізімдерін, аты-жөндерін, қанша гектар пайдаланып отыр дегенді. Біз құзырлы орындарға шығып, оны міндетті түрде қайтартамыз. Қалың қауымға тиесілі аумақты қайтара алмаса жұртшылық Президенттен көмек сұрауға мәжбүр. Өйткені жайылымның жайы, малдың шұрайы болмаса, көкорай көктемде төрт түліктің еті де, бағасы да күрт құбылып кетуі әбден мүмкін дейді көпшілік. Мақсат Жақсыбайұлы, Алексей Мавнуков Бізді әлеуметтік желіде оқыңыздар: Youtube - / @informburo31kanal Facebook - / informburo31 Instagram - / informburo31 Vkontakte -
https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #Қасқасу #жайылымсыз_жұрт
