Біртұтас тәрбие, көптілді білім, Цифрлық Қазақстан

Тілдер кафедрасының дәстүрлі онкүндігі аясында 6 мамыр күні «Біртұтас тәрбие, көптілді білім, Цифрлық Қазақстан» тақырыбын арқау еткен іс-шаралар жалғасын тауып, ерекше форматта ұйымдастырылды. Атап айтқанда, орыс тілі пәні бойынша студенттер арасында «Умницы и умники» атты танымдық әрі зияткерлік олимпиада өткізілді. Бұл білім сайысы – студенттердің тілдік құзыреттілігін арттыру, орыс тіліне деген қызығушылығын дамыту, ой-өрісін кеңейту және шығармашылық қабілеттерін шыңдау мақсатында ұйымдастырылды. Іс-шараның ұйымдастырушысы – орыс тілі пәнінің оқытушысы Тоқсанбаева Болсынай. Ұйымдастыру барысында ол студенттердің білім деңгейіне сай мазмұнды және қызықты тапсырмалар әзірлеп, олардың тілдік дағдыларын жан-жақты бағалауға мүмкіндік жасады. Олимпиада бірнеше кезеңнен тұрды: грамматикалық ережелерге негізделген тапсырмалар, логикалық сұрақтар, сөз байлығын тексеретін бөлімдер мен ауызша сөйлеу дағдыларын бағалауға бағытталған сұрақтар қамтылды. Шараның сапалы өтуіне кафедра оқытушылары Байдуллаева А., Аблаева Ж. әділ бағалау үдерісіне өз үлестерін қосты. Олимпиадаға қатысқан студенттер өз білімдерін барынша көрсетіп, белсенділік танытып, жоғары нәтиже көрсетті. Жеңімпаздар I және II орындармен марапатталып, алғыс хаттар мен дипломдар табысталды. Мұндай іс-шаралар тек тіл үйренуге деген ынтаны арттырып қана қоймай, болашақ мамандардың көптілді ортада еркін сөйлей алатын, заманауи талаптарға сай тұлға болып қалыптасуына да зор ықпал етеді. Бұл – цифрлық Қазақстан жағдайында бәсекеге қабілетті, жан-жақты дамыған жас ұрпақты тәрбиелеуге бағытталған маңызды қадамдардың бірі.