7 қараша күні Еңбекші ауылдық кітапханасында Қазақтың көрнекті жазушысы, ақын, қазақ әдебиетін қалыптастырушылардың бірегейі Бейімбет Майлиннің туылғанына 130 жыл толуына орай "Алыптар тобындағы ірі тұлға" атты прозалық кеш ұйымдастырылды. Шараны кітапханашы Назгуль Кулачарқызы жүргізіп, кітап көрмеге шолу жасады. Ербол Сыпатаев атындағы орта мектептің 9"а" сынып оқушылары қатысып, Жапар Азамат, Алтынбек Рахым және Әбимолда Динара жазушының өмірі жайлы мағлұмат беріп өтті. Мақсаты: оқырмандарға жазушы өмірінен мәліметтер беру, халқымыздың ұлы жазушысы Бейімбет Майлиннің ерекше тұлға екенін көрсету, өмірі мен шығармашылығын таныстыру. XX ғасырдағы қазақ әдебиетінің аса көрнекті өкілдерінің бірегейі — Бейімбет Майлин. Ол поэзия, проза, драматургия жанрларында өнімді еңбек етіп, өз дәуірінің шындығын, қазақ елінің, әсіресе ауыл адамының санасындағы өзгерулер мен жаңаруларды, халықтың бастан кешірген күрделі оқиғаларын, әлеуметтік өмірдің шытырман қайшылықтарын көрсетті. Кеңестік заманның алғашқы жиырма жыл ішіндегі қоғамдық құбылыстардың еңбекші адамға тигізген әсерін, қазақ халқының ғасырлар бойында қалыптасқан тұрмыстық, салттық болмысының, шаруашылық, кәсіптік негізінің жойылып, оның орнына жаңа қүрылымдардың табиғи орын теуіп болмаған кезеңінің сыры мен мұңын шебер суреттеді.
