БАҒАНАЛЫ ТҮКІ НАЙМАН. ТҮКІ БАТЫР ҰРПАҚТАРЫНЫҢ АТА-ҚОНЫСЫНА ЗИЯРАТЫ. 2007 жыл. 1-БӨЛІМ

Қазақ халқының ұлттық дүниетанымын, өз тарихы мен жеті атасын білуге, тануға деген пейілін, көзқарасын танытатын жәдігердің негізгілерінің бірі - шежірелер. Шежіре - дала мәдениетінің өзіндік ерекше үлгісі. Қазақ халқы ауызша және жазбаша шығарылған шежірелерге, олардың шындыққа жақын болуына ерекше мән берген. Өздерінің тектілік, қандық даму сатысын осылайша, жіпке тізгендей етіп сақтап отырған. Шежіре - халықтық терең дүниетанымының жемісі, түптеп келгенде, қанның тазалығын, ұрпақтың тәні таза, жаны сау болуын көздеген іргелі ілімінің көрінісі. Тереңнен тамыр тартатын халықтық ілім мен оның мәдени-рухани деңгейін қалыптастырған шежіре әлемдік дүниетанымда теңдесі жоқ іргелі жүйе ретінде таныла алады.