БАҒАНАЛЫ ТҮКІ НАЙМАН. ТҮКІ БАТЫР ҰРПАҚТАРЫНЫҢ АТА-ҚОНЫСЫНА ЗИЯРАТЫ. 2007 жыл. 2-БӨЛІМ

Найман руының тарихы тереңде жатыр. Қазақ елінің басым көпшілігін құрайтын осынау аталықтың тарихына көз жүгіртсек Бағаналы елі үлкен аталық. Бағаналы аталығы өз алдына бір қауым ел десек, осы Бағаналы тармағынан тарайтын Ақтаз аталығының мекен еткен жерлері: Ұлытау, Кіші тау, Сары су өзені, Байқоңыр өзен аңғары мен Телікөлді көшіп-қонған жерлері, Торғай даласы және Ырғыз аймақтары деседі көнекөз қариялар. Соның ішінде Түкі аталығы Мұхамеджан Қаратаевтың естеліктер кітабында Телікөлде қыстаса, жайлауы жеті жүз - сегіз жүз шақырым қашықтықта жатқан арқадағы Есіл өзені болған. Ерте көктемде шыққан көш Талдыеспе мен Білеуті өзендерін өтіп, Қарсақбай мен Байқоңыр, Ұлытау мен Кішітау аралығын басып, Қаратоғай, Сарытоғай өзендерінен өтіп, Тасты, Тамды бұлақтарына жетіп, малын төлдеткен. Төлдер аяқтағаннан кейін малдың аянымен Есіл бойын барып жайлаған деп көрсетілген.