Карантинге байланысты қоғамдық көліктер қозғалысы шектелді. Аялдамаларда тұрғындар сағаттап автобус күтуге мәжбүр. Ал қала маңындағы елді мекендерден қатынап жұмыс істейтіндер үшін бұл жағдай оңайға соқпай тұр. Себебі автобустары мүлдем тоқтаған. Жолаушылар тасымалымен айналысатын екі кәсіпорынның барлық бағыттағы қозғалысына шектеу енгізілген. Діттеген жеріне жете алмай әлек болғандар, басқа бағыттағы автобустарға мініп кетуде. Сағаттап күтіп, сарылып тосып отырғандар қай бағыттың жүріп, қайсысы тоқтап тұрғанынан бейхабар. Тұрғындарды саяжайларға тасымалдайтын 32-ші бағыттағы автобустың қозғалыс кестесі еш өзгермеген. Уақытылы дезинфекциясын жасап, бұрынғы тәртіппен жүріп жатыр. Ал Кірпішті ауылына қатынайтын төрт автобустың екеуі ғана желіде жүр. Соған байланысты жолаушыларға бұл бағыттағы қоғамдық көліктерді ұзақ күтуге тура келеді. Қалада жолаушылар тасымалымен айналысатын екі кәсіпорынның бірі - "Автопарк" мекемесінде 34 бағыт болса, оның 12-сі тоқтап тұр. 3, 5, 16, 18, 20, 21, 22, 27, 28, 29, 39, 42 бағыттарда қатынайтын қоғамдық көліктер жүрмей қалды. Руслан Жылқамановтың айтуынша, автобус жүргізушілері масканы да өздері сатып алуы тиіс. Себебі, күніге бір адамға бірнеше бетперде керек. Онсыз да табыссыз қалған кәсіпорын үшін бұл - қып-қызыл шығын. Білгеніміз, карантин ұзаққа созылатын болса, "Автопарк" мекемесінің барлық автобустары желіге шықпай қалуы мүмкін. Ал "Ақтөбе қаласының жолушылар автокөлігі кәсіпорны" жауапкершілігі шектеулі серіктестігінің бөлім жетекшісі Асанәлі Бимырза автобустардың саны азайғанын, бірақ, ешқандай бағыттың тоқтатылмағанын айтты. Тек қозғалыс уақыты өзгерген. Сайт телеканала
Twitter / rika_kz Вконтакте
https://vk.com/rikatv 