Сайт использует сервис веб-аналитики Яндекс Метрика с помощью технологии «cookie». Пользуясь сайтом, вы даете согласие на использование данной технологии.
Қалада қоғамдық көліктердің бірқатарының қозғалыс кестесі өзгерді. Жолаушылар тасымалымен айналысатын мекемелер арасындағы тендер қаңтардың 19-да өткен. Оған екі компания: "Автопарк" және "Жолаушылар автокөлік кәсіпорыны" ЖШС-тері қатысты. 50 бағыттың 34-і "Автопаркке", қалғаны "Жолаушылар автокөлік кәсіпорнына" берілген. Соның ішінде №12,13,17 және 20 бағыттағы автобустар "Автопарк" иелігіне ауысты. Жаңа автобустар алдағы 10 күннің ішінде №7, 20, 15, 19, 29 және 46-шы бағыттар бойынша жолға шығады. Батыс-2 ауданы тұрғындарының сұрауы бойынша келесі аптадан бастап, "Газельдердің" орнына 42 орындық ПАЗ автобустары жүреді. Осы айдың ішінде 19,29 бағыттардың автобустары 110 адам сиятын жаңа ЛиАЗ көліктерімен ауыстырылады. Ал, №2,8, 23 және 39 бағыттағы автобустардың қозғалыс кестесі өзгереді. №8 бағыттағы автобус бұрынғы қозғалыс кестесіне қайта оралды. Бұған дейін Арынов, Пугачев көшелерімен жүрген автобус енді Малышка ауданы, Ембі көшесі арқылы Әуе қалашығы ауданындағы темір жол өткелімен әуежайға жетіп, осы жолмен кері қайтады. Бұл бағыттағы шағын автобустар 42 орындық ПАЗ автобустарына ауыстырылды. №23-бағытта бұрын ара қашықтығы 30 минуттан төрт автобус жүрген болса, енді екі автобусқа көбейеді. Және олар Қызылжар аулының жаңа аудандарына дейін баратын болады. Тұрғын үй-коммуналдық шаруашылық, жолаушылар көлігі және автомобиль жолдары бөліміндегілер қазір қоғамдық көліктерде жалпыға ортақ тариф белгілеу мәселесін қарастырып жатыр. Ол 55 теңге болмақ. Ал, оқушылар, студенттер, зейнеткерлер мен мүгедектердің жеңілдіктері сақталады.
