Қазақстанда бүйрек сату заңдастырылуы мүмкін. Мәжіліс депутаты Гүлдара Нұрымова ерікті түрде ақшаға туыс емес донорлардың бүйрегін алуға рұқсат етуді ұсынды. Олай болмаған жағдайда бұл сала тоқырап, донорға мұқтаж науқастардың саны жылдан жылға көбейе береді дейді. Бірақ медицина саласының мамандары бұған үзілді-кесілді қарсы. Себебі, ақылы трансплантация қара нарықта бүйрек саудасы көбейіп кетеді дейді. Бұл бастамаға тұрғындар қалай қарайды? Сарапшылар пікірі қандай? Әріптесім Руслан Жасұланұлы жалғастырсын. Қазақстанда қазіргі күні 3805 науқас орган трансплантациясына мұқтаж болса, оның үш мыңнан астамы бүйрек ауыстыру кезегінде тұр. Екі бүйрегінен де айырылған науқастардың көбі гемодиализбен, яғни жасанды бүйрекпен өмір сүреді. Соның салдарынан еңбек етуге де мүмкіншілігі жоқ. Мәжіліс депутаты Гүлдара Нұрымова осы мәселелерді ескеріп, елімізде ақылы түрде бүйрек трансплантациясына рұқсат беруді ұсынды. Бұл донорлық ағзалардың жетіспеушілігін шешеді деген үмітте. ГҮЛДАРА НҰРЫМОВА, ҚР Парламенті мәжілісінің депутаты: – Бөтен адам органын беруге дайын. Бірақ оған заң бойынша рұқсат жоқ. Осыған орай материалдық өтемақыға ерікті түрде туыс емес донорлардың және қайтыс болған донорлардың бүйрегін беруге рұқсат ету мүмкіндігін қарастыру қажет. Отандық емханаларда мұндай ота тегін жасалады. Сапалы құрылғылар мен білікті мамандар да бар. Бұл ретте депутат Пәкістан мен Иранның тәжірибесін мысалға келтірді. Онда бүйрек сату заңдастырылып, реттеледі екен. Ал бағасы 5-6 мың доллар шамасында дейді. Ал бұл жөнінде халықтың пікірі екіге бөлінді. Бірақ медицина саласындағы сарапшылар бұған ешқашан жол бермеу керек дейді. Өйткені бұл қолдан киллерлерді дайындап шығарумен тең бастама екенін айтады. Расул Дүйсеновтің сөзінше, бұдан кейін заңсыз бүйрек саудасы қызып кетеді деп күдіктенеді. РАСУЛ ДҮЙСЕНОВ, медициналық сарапшы: – Осыдан кейін қара нарықта бүйрек саудасы жаппай көбейеді. Бірін бопсалайды. Енді бірі несиесін төлей алмай, не қарызға белшесінен батқандықтан бүйректі сата бастайды. Әртүрлі қылмысқа баруы мүмкін. Сондықтан тек тегін әрі, ерікті түрде донор болу керек. Бұл шын мәнінде мұқтаждарға көмектесуге мүмкіндік береді. Сарапшының айтуынша, «Ағзаны сатуға тыйым салу» туралы халықаралық конвенцияға Қазақстан да қосылған. Осыған сәйкес халықаралық міндеттемелерді орындауы тиіс. Сондықтан елімізде ақылы бүйрек трансплантациясына жол берілмейді деген үмітте. Бізді әлеуметтік желіде оқыңыздар: Youtube - / @informburo31kanal Facebook - / informburo31 Instagram - / informburo31 Vkontakte -
https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
