Д-р Дудучки: Нема емпатија, нема знаење, нема кредибилност, тоа е причина за поделено општество

➡Акроним од дијагнозата на македонското општество е МАММА синдром, во превод малигни архетипски македонски мазохистички автодеструктизам. Архетипски изгледа дека на некој начин во колективниот геном ни е вградено дека кубурата ќе ни се најде за некои лоши времиња и дека наведнатата глава сабја не ја сече, односно тој наш следен елемент - мазохизам, како да ни е вграден. ➡Ни недостасува етичко и естетичко образование. Човек кој има естетски критериуми вградени во себе нема да ја уништува и загадува околината во која живее. ➡Мојата сопруга е професор во пензија и на еден состав „што би сакале децата да бидат“, малите кумановчани одговориле дека би сакале да работат во Ирак и Авганистан, еден дел сакале да бидат фудбалери, а еден дел од девојчињата би сакале да бидат Јелена Карлеуша. Сиот тој кич и шунд и во ментална и во културолошка и во социјална смисла е само последица на нелегитимна потреба на одредени структури од општеството да остваруваат енормни профити. ➡Наместо советите да бидат од стари, умни, со искуство, со стручен, научен, искуствен бекграунд ние ставаме деца што само лепеле плакати и трчале за партијата. ➡Треба знаење, треба луѓе со умеење од инфраструктура, од геополитика, урбанизам, хортикултурно уредување, наука, спорт, уметност, култура, правосуден систем, меѓународно право, од сите сфери на општествено живеење. ➡Поделба настана со цел да се створат партиски војски, да се створи еден квантум на партиска клиентела која ќе гласа без поговор. ➡Ајде да направиме психолошко тестови на сите кои седат во парламентот. На сите избрани носители на јавни функции, од претседателот, премиерот, членови на кабинетот. Ајде на направиме. Ајде да ги видиме нивните морални, етички капацитети, нивните интегративни способности. Ќе се разочараме, смета д-р Мице Дудучки.