Eсебі жоқ есек жұрттың мазасын қашырды

Жамбыл облысында есебі жоқ есек жұрттың мазасын қашырып отыр. Ен далада еркін кезген жануар жайлау біткенді жайпап, елдімекендерді басып алған. Онсыз да төрт түлігіне жем-шөп таба алмаған тұрғындар есек үшін ата қоныстан көшуден басқа амал қалмады деп ашулы. Сорақысы сол азық таппаған есектер үйір-үйірімен өріс біткенді өлексеге толтырған. Есек үйірі көрер көзге қорқынышты. Құдды жер жаһанды жау шаппай жаулап алуға айналғандай. Анығында солай. Қазір Байзақ пен Талас ауданының жайылымы тып-типыл. Азық іздеген жануарлар ауылға бет алған. ЖАҚИЯ АЯҒАНОВ, ауыл тұрғыны: Далада да жейтін түк қалмады. Енді көшеге келіп, өзіміз жинап қойған шөбімізді жеп жатыр. Ауылдың болашағынан ешқандай болашақ көріп отырған жоқпын есектен. Осы есек бізге қасірет болды. Ауылдың малынан көп. 3 мың есек дейді. Мұндағы жұрт шабындық шабуды, бау-бақша баптауды қойғалы қашан?! Күндіз қорығанмен түнде таптап еңбекті еш етті дейді. Атырапты аздырған есектер азық таппай жаппай қырылып жатыр. Міне мысал, Талас өзенінің іші өлексеге тола. НҰРАДИН РАҚАЙ, тілші: Өріс біткен өлексеге толды деген жұрттың өкпесі орынды. Жасыл желек шаңғытқа, айнадала ақ құмға айналған. Әр жерде осындай өлімін күткен көтерем есектен көз сүрінеді. Соның бірі мынау. Жатып қалған бұл есек. Енді тұрмасы анық. Шу-шу Бір қызығы есек бағып жүрген ешкім жоқ. Есесіне жасына қарай кәсіпкер әр аймақтан 25-30 көлемінде есек сатып алуды жалғастыруда дейді жұрт. Әкеледі, басы ауған жаққа жібереді. Жұрт өлекседен індет тарай ма деп алаңдайды. Ал аудан басшылары бұл ахуалдан хабардар. Алайда кәсіпкерді шақыртып алдырта алмапты. Жоғары жақтың бәріне арыз жазып әлекпіз дейді. ОЛЖАС БАҚҚАРАЕВ, Байзақ ауданының әкімі: Ол кісіні бірнеше рет шақырдық дегенмен әкімдікке келмейді. Телефонын көтермейді. Оны құзырлы органдарға да бердік, арнайы инспекцияға да бердік. Вет службаға да бердік. Негізгі құзырет соларда. Қазір жаппай қырылған есектердің дертін мамандар анықтауға кірісті. Бір анығы аймақ басшылары есек өнеркәсібі үшін инвесторға жер бермепті. Бірақ кәсіпкер жергілікті жеке шаруалармен келісіп іс бастап кеткен көрінеді. #Информбюро #31арна #БастыЖаңалықтар #Новости #31канал