Жедел ішек инфекциялары – жаз мезгіліндегі басты қауіп

Жаз – серуен мен демалыстың, табиғат аясындағы тамақтану мен жеміс-жидек маусымының уақыты. Алайда дәл осы кезең – жедел ішек инфекциялары мен энтеровирустық аурулардың күрт көбейетін шағы. ҚР Денсаулық сақтау министрлігінің штаттан тыс бас инфекционисі Динагүл Баешева бұл маусымда балалар денсаулығына ерекше мән беру керектігін ескертеді. Оның айтуынша, егер бала әлсіреп, көзі шүңірейіп, тамақ пен судан бас тартып, құсып, мазасызданып, ұйқышыл күйде болса – бұл ауыр сусызданудың белгісі. Мұндай жағдайда уақыт жоғалтпай, бірден дәрігерге қаралу қажет. Профессордың айтуынша, жемістің қайдан және қалай өсірілгені аса маңызды. «Егер өз бақшаңызда өсіп, таза сумен суарылған жемісті жесеңіз – қорқатын ештеңе жоқ. Ал базардан немесе көшеден алынған, ашық күйде сатылып жатқан өнімдерге түрлі микробтар, шыбын-шіркей арқылы инфекциялар жұғуы мүмкін. Сол себепті кез келген жемісті міндетті түрде жақсылап жуыңыз. Мүмкіндік болса, үстінен ыстық су құйып жіберіңіз – бұл микроағзалар мөлшерін азайтады», – дейді Динагүл Аяпбекқызы. Бұдан бөлек, жаз келгенде балалар ашық су қоймалары мен субұрқақтарда ойнауға ұмтылады. Бірақ мұндай жерлерде энтеровирустық инфекциялардың таралу қаупі жоғары. Бұл вирус ауамен, лас сумен, жуылмаған тағаммен немесе қолмен ағзаға оңай енеді. Энтеровирус баланың денсаулығына әртүрлі жолмен әсер етуі мүмкін – дене қызуын көтеріп, бөртпе туғызады, тіпті жүйке жүйесі мен жүрекке зақым келтіруі ықтимал. Сондықтан алдын алу – ең тиімді қорғаныс. Балаларымыздың амандығы – біздің қарапайым әрі уақтылы әрекеттерімізге байланысты.