Балалар реаниматологының бір күні: шақалақтан – ауыр диагноздарға дейін

«Реаниматолог – жауапкершілігі жоғары мамандық. Өмір мен өлім күреске түскен сәтте қателесуге болмайды», – дейді ҚР Денсаулық сақтау министрлігінің штаттан тыс реаниматологы Нұрсұлтан Құрбанбеков. Терезеден құлаған бала, туа біткен ақаумен шұғыл жеткізілген нәресте, тыныс алмай жатқан сәби… Осындай сәттерде тек кәсіби суыққандылық пен шұғыл шешім ғана өмірді құтқарады. Ол үшін дертіне дауа іздеп келген жанды ажалдан арашалау – күнделікті жұмыс. Ал көптің алғысын алу – үлкен бақыт. «Жаңа туған нәресте – біздің ең кішкентай пациентіміз болуы мүмкін. Бір күндік, 600 грамм салмақта дүниеге келген сәбиге алғашқы ота жасау – біздің міндет. Ол үшін бізге тек білім мен техника емес, жүрек те керек. Бірақ эмоцияға жол жоқ. Біз ең алдымен – маманбыз», – дейді Нұрсұлтан Әуелбекұлы. Әр секунд маңызды, әр шешім – бір адамның тағдыры. Реаниматолог дәрігердің айтуынша, мамандықты әбден меңгердім деп толысуға болмайды. Күн сайын өз-өзіңді жетілдіріп отыру керек.