Kaspi-де жаңа инновация: Қазақстандықтар енді алақан арқылы төлем жасай алады

Қазақстандықтар енді алақан арқылы төлем жасай алады. Kaspi жаңа инновациялық қызмет түрін іске қосып, клиенттердің өмірін жеңілдетті. Жаңа жүйе Kaspi Алақан деп аталды. Бұл сервисті отандастарымыз келесі айдан бастап пайдалана алады. Алматыда өткен таныстырылымда Kaspi компаниясының басшысы және негізін қалаушы Михаил Ломтадзе кәсіпкерлерге арналған жаңашылдықтар туралы да айтып өтті. Толығырақ әріптесім Сымбат Ғалымбекұлы айтып берсін. Kaspi-дің жаңа сервистерінің таныстырылымына келушілердің қарасы көп болды. Барлығы компаниядан ерекше бір жаңалықты асыға күтті. Қонақтардың үміті толықтай ақталды. Алматыдағы жаңа театрдың сахнасына шыққан Kaspi компаниясының басшысы Михаил Ломтадзе төлем жасаудың ең жаңашыл тәсілдерінің бірін таныстырды. Енді қазақстандықтар дүкендерде смартфонсыз, тек алақандарын пайдаланып сауда жасай алады. Жаңа сервис Kaspi Алақан деп аталды. Алақан арқылы төлем жасаған алғашқы адам аралас жекпе-жек шебері Шавкат Рахмонов болды. Kaspi Alaqan – бұл Kaspi.kz компаниясының өз өнімі. Атауы ретінде әр қазақстандыққа түсінікті және қарапайым сөз таңдалған. Осы қызметті әзірлеген мамандардың айтуынша, алақан арқылы төлем жасау толықтай қауіпсіз. Әр адамның алақаны бірегей, ал Kaspi Alaqan сол ақпаратты цифрлық кодқа айналдырады. Бұған қоса, Михаил Ломтадзе Kaspi AI жүйесін де көпшілікке көрсетті. Бұл — Kaspi Магазинмен серіктес болған кәсіпкерлерге арналған интеллектуалды көмекші. Ол тауар карточкаларын жасауға көмектесіп, суреттерді әрлеп, сипаттаманы жазып береді. Kaspi AI қызметі бизнес өкілдеріне 2026 жылдың қаңтар айында қолжетімді болады. МИХАИЛ ЛОМТАДЗЕ, KASPI.KZ басшысы: Бұрын бір сағат уақытыңды сурет пен сипаттама ойлап табуға жұмсасаң, енді бар болғаны бір минутта Kaspi AI көмегімен Kaspi дүкеніндегі өніміңнің сипаттамасын дайындауға болады. Нәтижесінде сатылым 50 пайызға дейін артады. Бұл көмекші — клиенттерге өз тауары туралы ақпаратты түсінікті жеткізіп, клиенттердің дұрыс таңдау жасауына мүмкіндік беретін құрал. Бұл — біздің іске қосқан алғашқы қызметіміз және біз Kaspi AI жүйесін алдағы уақытта да дамыта береміз. Kaspi-дің жаңашылдығы көпшілікті таңқалдырды. Қонақтар Михаил Ломтадзе мен оның командасына алғыс айтты. Себебі, Kaspi өз қызметтерін заман талабына сай үнемі жаңартып отырады. МАДИНА РЫСПАМБЕТ, Алматы қаласының тұрғыны: Kaspi мен үшін ең ыңғайлы қосымша. Күнде қолданамын. Kaspi-сіз өмірімді елестете алмаймын. Енді алақанмен төлесек біздің өміріміз одан да жеңіл болады. Жаңа деңгейдегі зат деп ойлаймын. Бүкіл әлемде ондай жоқ, достар! АЙЖАН МАРАТҚЫЗЫ, Алматы қаласының тұрғыны: Шыны керек эмоциям сан алуан болып тұр. Себебі, технологиялар дамыған заманда біздің елге де жаңа төлемнің түрі кіріп жатқаны кәдімгідей таң қалдырады және қуантады. Kaspi.kz-тің кезекті инновацияларының таныстырылымы күткендегідей үлкен әсер қалдырды. Жаңа қызметтерге қарап қаржы, цифрлық әлемде жаңа дәуір басталды деп айтуға болады. #Информбюро #31арна #БастыЖаңалықтар #Новости #31канал