Дәрігердің дәрменсіздігі ме? Таразда аурухана төсегіне таңылған азамат табытпен шықты

Таразда тағы да дәрігердің дәрменсіздігінен аурухана төсегіне таңылған азамат табытпен шыққан. Марқұмның туыстары 39 жастағы Мұхтар Исабековтің ажалы ақ халаттылардың салғырттығының салдары екенін тәуелсіз сарапшылар растаған деп отыр. Алайда, тергеуге жеткен іс 9 айдан бері тежеліп тұр деген жақындары бүгін полиция департаментін басына көтерді. Әріптесім Нұрадин Рақай мәселенің мәнісін біліп келді. 39 жастағы азамат жыл басында өзін жайсыз сезініп қалалық ауруханаға барған. Бірақ қабылдаудың өзі қиямет қайым болды дейді ағасы. Сөйтсе мәселе орын тапшылығынан емес екен. Саулығы үшін сұрағанын бергенмен сауыққан інім болмады дейді. Өкпесі суға толған науқасты сабылтып қойып, қараусыз қалдырғанына қапалы. Жанына батқан дертіне дауа болмасын білген Мұхтар Исабеков анасына алып кетуді өтініп түні бойы хабарласқанын айтады. Ертесі бұл өтініші арманға айналарын білмедік деп отыр. Дәрігер берген анықтамада өкпедегі су болмашы ғана болған десе, мәйітханада 1,5 литр су шыққан дейді туыстары. Кейін тәуелсіз сарапшыға жүгініп, ақ халаттылардың дер кезінде ем қабылдамағаны расталды деп отыр. Қылмыстық іс қозғалғанмен 9 айдан бері тергеушілер қайта-қайта ауысыпты. ГҮЛНАР ИСАБЕКОВА, марқұмның анасы: Сол жазылған күйінде қалып тұр. Істің қозғалуын сұраймын. Жазбаған жағымыз қалған жоқ. Облыстық, қалалыққа да жазып жатырмын. Астанаға да жазып жатырмыз. Тексерілсін дейді ешқандай тексерілмейді. Сол күйінде іс жатыр. Тергеуге көңілі толмаған туыстары департамент басшысының шығуын талап етті. Істің созбалаңға салынуы құзырлы орган қызметкерлерінің ауыз жаласуында деп түсінеді. Таңда келген көпті көп күткізген басшы тергеудің тым ұзап кетуін былай түсіндіреді. БАЙЖАН БАЙГЕЛДІ, Жамбыл облыстық полиция департаменті басшысының орынбасары: Екі ай беріледі. Содан кейін шешім қабылдауымыз керек. Ол жерде басқа да тергеу амалдарын жүргізетін болсақ, оны прокурор арқылы 3-4 айға ұзартамыз. Дәрігерге байланысты сараптамалар тағайындалған. Соған байланысты ҚК процессуалдық талаптарына байланысты істі уақыт создырамыз. Бұл жерде сараптамаға сот-медициналық қосымша сол жерде комиссия өткізейін деп отырмыз. Соған байланысты. Мұхтар Исабеков сот орындаушы болып жұмыс істеген екен. Марқұмның артында жұбайы мен бір қызы қалды. #Информбюро #31арна #БастыЖаңалықтар #Новости #31канал