Қарағанды облысындағы Қызыларай ауылы 90 жылдық мерейтойын атап өтті

Қарағанды облысының Ақтоғай ауданына қарасты Қызыларай ауылында жастар саябағы мен балалардың ойын алаңы ашылды. Келер жылы онда бүтін бір спорт кешені мен мешіттің құрылысы басталады. Ауыл ақсақалдары әлеуметтік нысанның алғашқы кірпішін қалады. Алдағы қыркүйекте шалғай ауылда ұялы байланыс жүйесі орнайды. Мұның барлығы – ауыл азаматтарының, осы жерден түлеп ұшқан жергілікті кәсіпкерлердің тартуы. 90 жылдық тарихы бар Қызыларай топырағында қазақтың талай дүлділдері дүниеге келген. Ақын, әнші Әсет Найманбаев пен қазақтан шыққан тұңғыш математик, профессор Әлімхан Ермеков – осы жердің перзенттері. Бұл күні көршілес Шабанбай би ауылындағы мектепте ескерткіш ашылды. Олег Ермеков, Әлімхан Ермековтың немересі: -Бүгін қатты қобалжып тұрмын. Қуанышымда шек жоқ. Менің атам ғұмырын ғылымға арнады. Оның асқақ рухы осы мектепте оқитын жас ұрпақты желеп-жебеп жатады деп ойлаймын. Келешекте осы шаңырақтан білімді азаматтардың шығатынына сенемін. Қызыларайдың 90 жылдық торқалы тойын өткізуге ауыл болып атсалысқан. Ал қаржының негізгі бөлігін жергілікті кәсіпкерлер көтеріпті. Бұл күні ауылда жастар саябағы мен балалар алаңы ел игілігіне берілді. Сонымен қатар қыркүйек айында шалғайда жатқан елді мекенге ұялы байланыс жүйесі орнатылатын болды. Мұнымен қоса жаңа спорт кешенінің алғашқы кірпіші де қаланды. Серік Қасымбеков, жеке кәсіпкер: -Осы жерде келесі жылы спорт кешенін бастаймыз. Сосын ауыл ақсақалдары мешіт салып беруді сұрап отыр. Себебі мешіт кішкентай. Тағы да әлеуметтік шаралар жасай береміз. Той жасаудағы басты мақсат – ауылды көркейту. Мереке күні Қызыларайдың тарихы туралы жаңа кітаптың тұсауы кесілді. Ақсақалдар ауылдың әр жылдардағы жетістігін, оған үлес қосқан тұлғалар туралы баяндама жасап, жастарға мол мағлұмат берсе, ақындар арнау арнады. Зәрухан Қабыханұлы, Қызыларай ауылының тұрғыны: -Бұл Елбасымыздың ауылды көркейту, жаңарту жөніндегі жобасының игі істері деп ойлаймын. Елден сыртқа көшіп кеткен азаматтар мына торқалы 90 жылдық тойға атсалысып, көмектесіп, ауылды көркейтіп жатыр. Бұл күні ауыл ішіне ақшаңқан үйлер тігіліп, әйгілі «Тоқырауын толқындары» ансамблі ән мен жырдан шашу шашты. Сондай-ақ ұлттық спорттың бірнеше түрінен жарыс өтті. 40-қа жуық сәйгүлік қатысқан аламан бәйгенің бас жүлдесін Балқаш қаласынан келген шабандоз иеленіп, көлік мінді. Жалпы Қызыларайдың тарихымен қатар, табиғаты да көркем. Орталық Қазақстандағы ең биік Ақсораң шыңы осы ауылда. Өлкенің осынау әсем жаратылысын суреттейтін жаңа бейнебаян бұл күні жұртқа таныстырылды. Бәкір Тәжібаевтың сөзіне жазылған Ескендір Хасанғалиевтің «Қызыларай» әнін жұрт жылы қабылдады. Авторлары: Ардақ Асылханұлы, Сайлау Игіліков, Аслан Демесбаев