№7 автобус жүргізушілері жұмысқа шықпай қалды

Ал көшелерді қар басып, көліктер кептеліп жатқанда жолаушылар №7 бағыттағы автобусты сағаттап күтті. Жүргізушілер ереуілдеп, 13 автобус рейске шықпай қалды. Оған жүргізушілер мен "Автопарк" мекемесінің басшылығы арасындағы дау себеп. Жүргізушілер күнделікті жолақыдан жиналатын жоспардың көптігі мен мардымсыз жалақыға наразы. Жұмыстың ауырлығын, айлықтың аздығы мен басшыларының әділетсіздігін айтып шағымданған жүргізушілер ең алдымен жолаушылардан кешірім сұрады. Күнделікті жоспар наурыз айында екі рет өсіпті. 21 мың теңгеден 23 мыңға дейін. Ал күні кеше басшылық, үстіне тағы екі мың теңге қосқан. Жүргізушілердің шыдамын тауысқан осы екі мың теңге. "Автопарк" ЖШС-нің басшылары болса, жүргізушілерді айыптап отыр. Түсетін ақша аз. Талаптарын да өзгертпек емес - қайткенде де күн сайын 25 мың теңге әкелуі тиіс. Ешкім жұмыстан қуылмайды, алайда жоспарды орындайды. Бүгін жұмысқа шықпай, наразылық білдірген жүргізушілер басшылықпен мәмілеге келмесек ертең де рейске шықпауымыз мүмкін деп отыр. Ал бүгін рейске шықпай қалған №7 бағыттағы 13 автобустың орнына өзге бағытта қатынайтын 8 автобус жіберілген. Сөйтіп қаладағы жолаушылар тасымалындағы тепе-теңдік бұзылды. Түнімен қаланы қар басып, боран соққаны тағы бар. Ал екі тарап 2 мың теңгенің жырын жырлап, ақшаларын түгендеуге кіріскенде жолаушылар аялдамаларда дірдектеп тұруға мәжбүр болды. "Автопарк" мекемесіндегі бұл былықты енді кімнің шешері беймәлім. Ертең №7 бағыттағы автобустар аялдамаға тағы да келмесе, демек "Автопарк" 25 мың теңге табу туралы жоспардан бас тартпағаны деп түсінген абзал.