Интернет мүмкіндігі артқан сайын, жұртты алдап оңай олжаға кенелгісі келетіндер көбейді. Мәселен, қызылордалық арбаға таңылған ақын Нұрмұхамед Әбілқасымов та интернет алаяқтарының құрбаны болдым деп отыр. Оның әлеуметтік желіде кең тараған балаларымен түскен эмоцияға толы видеосының бетіне біреулер өздерінің банк есепшоттарын жазып, жұрттан жылу жинаған. Ал он екі мүшем сау болмаса да, осы жасыма дейін адам баласына алақан жайып көрмедім деген Нұрмұхамед өзін пайдаланғысы келгендерге арызданбақ. Әлеуметтік желі арқылы тарап, көптің жүрегін елжіреткен осы бейнежазба. Онда Нұрмұхамедтің 3 жастағы ұлы мен қызы арбада отырған әкесіне құманмен су әкеліп, жуындырып жатады. Туғалы сал ауруына шалдықса да, тағдыр тауқыметіне мойымаған ақынды балалары тамақтандырып, қолғабыс қылады. Бұл видеоны Нұрмұхамедтің келіншегі түсіріп, туыстарына жолдаған. Бірақ бірнеше күннен соң белгісіз адамдар бейнежазбаның бетіне есепшоттарын жазып, жұрттан қаржылай көмек сұраған. Дәл осы видео ғаламторды шарлап, Нұрмұхамедтің өз қолына түскен. НҰРМҰХАМЕД ӘБІЛҚАСЫМОВ, ақын: – Мен ойлағанмын, ешкімге неғылмай-ақ қояйын. Бір Алла жазасын береді деп. Бірақ қазір ойласам ол пәленбай адамның ақшасын жинап жатыр. Оның шотын міндетті түрде бұғаттау керек. Нұрмұхамед енді құзырлы органдарға арызданбақшы. Заңгерлер жақсылық жасағысы келетін азаматтар алаяқтардың құрығына түспеу үшін, ақпаратты барынша тексергені жөн дейді. Әрі тек ресми тіркелген қоғамдық қорларға ғана қаржы аударуға шақырады. НҰРСҰЛТАН БАЙМЕНОВ, заңгер: – Қоғамдық қорлардың реквизиті бар, олардың мәліметтері бар. Соған сәйкес әрекет жасаған дұрыс. Өйткені кез-келген адамның сыртынан мұндай әрекет жасалып жатқандар көп. Сіздердегі бір ғана факт, ондайлар жетеді. Расымен, интернет арқылы халықтан ақша жинап жүргендер жетерлік. Бірақ, олардың жарнамаларын тергеп-тексеріп жатқан ешкім жоқ. Тек құзырлыларға арызданған жағдайда ғана, іс қозғалуы мүмкін. Мәселен бір ғана Қызылорда облысында соңғы екі айдың ішінде интернет алаяқтығымен 36 қылмыстық іс тіркелген. Абай Нұржанұлы, Рахымжан Ысқақов Бізді әлеуметтік желіде оқыңыздар: Youtube - / @informburo31kanal Facebook - / informburo31 Instagram - / informburo31 Vkontakte -
https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #интернет_алаяқтық #мошенничество #тергеу