Слова: Алирзы Саидова (1932-1978) Музыка: Гаджикерима Максумова 1 Зи азизди, цуькведин пеш хьайила, Адан рикIиз тIар жедайди чидачни? Тахсир квачиз вилерал нагъв гъайила, Накъварикай хар жедайди чидачни? Тикрарбенд: Къадир гвачиз гъил вегьейтIа чуьнгуьрдал, Адан симер кIар жедайди чидачни? Мекь цайитIа, рикIевай экв суьргуьндай, Суза хьтин гар жедайди чидачни 2 Пелел бириш гъана хци чукIул хьиз Лагьай гафар пар жедайди чидачни? Луварикай хкатнавай цIакул хьиз Турла, зи рикI дар жедайди чидачни? Тикрарбенд: РикI шуьше я – жизви алмас хкIуртIа, Адал дерин цIар жедайди чидачни? Азизди, зи рикI ви рикIе акьуртIа, Дуьнья кудай цIай жедайди чидачни?