Бичигдээд 15 жилийн хойно “Аянгат цагийн тууж” нэрээр монгол хэлнээ гарсан зохиолын минь эх нэр нь “Айнэ тувинишэ гэшихтэ” буюу “Тува тууж” билээ. Йоханнес Бобровский хэмээх славян нэртэй, литва гаралтай, герман хэлтэй зохиолчийн “Айнэ литауишэ гэшихтэ” (Литва домог-түүх) нэртэй, хагас хуудас орчим хэмжээтэй бэсрэг өгүүллэгийг унштал өөрийн нутаг усны тухайд ингээд хуучилбал надад ч хэлэх юм бий дээ гэсэн шүү бодол толгойд орж ирээд тэр даруй нөгөө гарчгийг тавьж авсан санагдана. Харин дараа нь бичээд эхэлтэл миний бодсончлон аягатай цай хөрөхийн хооронд гараас гарчих уянгын бэсрэг ч биш, бүтэн юм уу хоёр, аягүй бол гурав дөрвөн хуудаснаас наашгүй, нэлээн сунжруу өгүүллэг болмоор бодогдоод дургүй хүрч, зүрх зориг ч бяцхан алдарч байсан. Гэхдээ өөрийгөө тайвшруулах арга хайн, за яахав, бяцхан сунавал ч сунаг, ан авд мордож байгаа тува эрийн л зураг гарна биз гэсхийн бичээд сууж байтал Жанибекийн нэр, царай зүс аяндаа тодроод ирж билээ. *** Миний суваг: / vajra.mn / vajra.mn Ном болон аялалтай холбоотой: / vajra.traveler / vajra.travel
