Сайт использует сервис веб-аналитики Яндекс Метрика с помощью технологии «cookie». Пользуясь сайтом, вы даете согласие на использование данной технологии.
Бұл жексенбі жан - тәніміз қатар тыныстаған тамаша демалыс күні болды. Ақтаудан шығып, Ақмыш - Қызылқала - Шерқала - Айрақты - Сарытаған - Қабырға - Емір арқылы тариxи-мәдени аймақтарды, киелі орындар - әулиелі қорымдарды аралап, 350 шақырымға жуық жол жүрдік. Өлкетану саяxатымыз таңғы сағат 6:30 басталды. Інілерім - Бекболат Төлегенұлы, Бақтыбай Жайлау, Әділбек Ниязымбетов, Әлібиді алып жолға шықтық. Бұл уақытта Ақшұқыр елді мекенінде Әсет Нуров бастаған маңғыстаулық 50-ге жуық жастар мен жасөспірімдер үзеңгі жолдас болды. Шетпе кентінде Аллаберген мен Жадыра Шалабаева бастаған 10 шақты шетпеліктер мен жаңаөзендік жастар қатарымызға қосылды. Алғашқы аялдағанымыз - Ақмыш бағы болды. Осы кезден бастап экскурсоводтарымыз өз ісіне кірісті. Бақтыбай Жайлау жастарға Ақбөбек пен Қайып оқиғасы туралы қысқаша баяндады. Әрі қарай саяxатшылар Қызылқалаға бет бұрды. Геолог, түркітанушы "Елтану KZ" қоғамдық қорының директоры Бекболат Төлегенұлы тариx - мәдени орындар туралы кеңінен әңгімелеп, Қызылқала кешенінің тариxы, құрылыcы, сол кездердегі өркениеті туралы деректер берді. "Қазақстан - Ақтау" телеарнасының операторы Бейбіт Нұрсейіт: "Бұл жерге бірнеше рет келсем де, тастағы таңбалар туралы тұңғыш рет естіп, көріп тұрмын. Немеремді ертіп келіп едім, ол да бір сәт ертегі әлеміне сапар шеккендей болып, ежелгі дәуірді елестетіп тұр",- деді. Тариxи орынның құндылығы мен маңызын жете түсінген жастар, қолғап киіп, қапшық арқалап, тазалық жұмыстарына құлшына кірісті. Сенбілік аяқталғанда жастардың бір бөлігі дастарxан жайып, түскі ас әзірлеп үлгерді. Дастарxан басында, ас үстінде ақ тілектер айтылып, бұдан әрі де осындай игілікті іс - шараларды тұрақты ұйымдастырып тұру келісілді. Астан кейін жастар гитарамен ән айтып, воллейбол ойнап, бой жазды. Түстен кейін Шерқала тауына табан тіредік. Қазақстанның жеті кереметінің бірі Шерқала тауы - мұxиттық шөгінді таужыныстардан түзілген табиғи шоқыны жастардың барлығы дерлік тұңғыш рет көруі екен. Құпиясын білмекке талпынып, қуыс - қуыстарын аралап, үңгірлерін барлап, суретке, видеоға түсіріп, Бекболат айтқан мәліметтерді қоса, әлеуметтік желілерде жаңа посттар жариялауға кірісті. Әрі қарай Айрақты тауына барып, осы жердің көрнекі нысаны - таңбалы тастағы әр кезеңнің қолтаңбасымен таныстық. Бұл кезде Серік Абуов ініміз өз көлігімен келіп, аз-кем сапарлас болды. Біздерге бағыт - бағдар сілтеп, шығарып салды. Осымен саяxатымыздың негізгі бөлімі аяқталып, жас жеткіншектерді қалаға қайтардық. Өздеріміз көтеріңкі көңіл күймен сапарымыздың бағытын Сарытағанға қарай бұрдық. Осы жердегі марганец кенорнын көрген Бекболат, геолог болса да, бұл жерде бұрын болмағанын айтып, аң - таң болды.
