VIDEO
Жил бүрийн адилаар 2024 он шинэ технологи, шинэ бүтээгдэхүүн, шинэ туршилтаар дүүрэн 365 хоног байлаа. Технологийн гигантууд AI салбарт гол анхаарлаа хандуулж, анхны AI утаснууд худалдаанд гарлаа. Харин бөмбөрцгийн нөгөө талд амьдардаг хүмүүс Apple Vision Pro-оор гангарч биднээс хэдэн жилийн алсад амьдардаг гэдгээ дахин нэг удаа нотлов. Төхөөрөмж үйлдвэрлэгчид цахиурын хөндийн анхдагч Интелээс татгалзаж эхэлсэн нь компаниа зарах талаар хүртэл ярих хэмжээнд шалдаа буулгаж, хаалгаа барих эрсдэлтэй нүүр тулав. Тэдэнд засгийн газар нь дэмжлэг үзүүлж хөл дээр нь босгохыг хичээж байна. Харин энэ салбарт шинэ тоглогчид цахиур хагалж Nvidia, AMD, Broadcom хэдэн их наяд доллароор хэмжигдэж эхэллээ. Ирэх жилүүдэд хиймэл оюуны дэд бүтэц баригдаж дууссаны дараа энэ чиглэлийн програм хөгжүүлэгч компаниуд тренд болох болно. Эртнээс тэдэнд анхаарлаа хандуулаарай. Харин манай урд хөршийн технологийнхон хүчтэйгээр эргэн ирж цахилгаан машины салбарт олон улсад хүлээн зөвшөөрөгдөж эхлэв. Xiaomi SU7 технологи суурьтай компани хэрхэн дэвшилтэт автомашин бүтээж болохын тод илрэл боллоо. Гэвч нөгөө талд VW түүхэндээ анх удаа үйлдвэрээ хаав. Оны өмнөхөн Huawei нэг ч хэсэг нь Америкт үйлдвэрлэгдээгүй утас бүтээснээ яруу тодоор зарласан нь тэдний 2019 оноос хойшхи хамгийн том мэдэгдэл байв. Олон жил яригдсан сошиал медиагийн хязгаарлалтууд ирэх жилээс хэрэгжиж эхлэх гэж байна. Австрали улс бага насны хүүхдэд сошиал медиаг хориглосон анхны улс болов. Тэдний араас ЕХ мөн адил хориг тавих талаар хэлэлцэж байна. Бусад орнууд уг журмыг яаж хүлээж авах нь сошиал медиа гигант Мета-ийн толгойны өвчин болоод байна. Танилцуулсан, ярьсан болгон нь технологийн салбарынхны ярианы сэдэв болоод буй OpenAI оны төгсгөлд ашгийн статус руу шилжих төлөвлөгөөгөө танилцууллаа. Тэд ийнхүү анхны зорилгоосоо ухарсан нь И.Маскийн дургүйцлийг хүргэж байгаа. Түүнээс гадна М.Зукрберг хүртэл тэднийг зогсоох саналыг дээд шүүхэд гаргаад амжлаа. Энэ жил хайлтын системээ бүх хэрэглэгчдэд нээлттэй болгосон тэд ирэх жилээс томчуудтай ашгийн төлөө алалцаж эхэлнэ. Харин манай улсад 10 жилийн дараа Apple Pay нэвтэрч, 5 жилийн дараа 5G асав. Эндээс 2024 онд ч гэсэн бид өнгөрсөнд амьдарсан нь харагдаж байна. 2025 он энэ зайг ойртуулахыг төлөө ажиллая. 2025 онд дэвшүүлж буй 5 таамаг: Apple анхны 4 их наяд доллароор үнэлэгдсэн компани болно. OpenAI-ийн гол өрсөлдөгчийн моделиуд масс хэрэглээнд нэвтэрнэ. Apple Vision Pro-ийн хямд хувилбар гарна. Google хуваагдахаас аврагдана. Sora бүтэлгүйтнэ.
