Үрдэл (2020) бириэмийэ сүүмэрдээһинигэр киирбит, "Суолаҕа" ырыам туһунан суруйар буоллахха маннык. 2011 сыл, сайын, Хабаровскай куорат, Князь-Волконское-1 байыаннай гарнизон (16788 войсковай чаас). Бүтүн бригаданан разводка стройдаан турабыт, мин дойдубун Сахам сирин ахтан бөҕөбүн. Платц тула үүммүт чээлэй күөх сэбирдэхтэрдээх мастары көрө-көрө, "Һуу, арай биир күн эмискэ дойдубар баар буола түспэппин ээ" диэн испэр саныыбын, "Бу туруох кэриэтин, Суолаҕа оттуу сылдьыбыт киһи баар инии. Эдьиийим Таанньа тугу гына сылдьара буолла? Былырыын баччаларга аймахтары мунньан, үөрэхпин бүтэрбитим иһин малааһын остуолун тэрийбитэ, наһаа үчүгэй күн буолан ааспыта" диэммин эдьиийбин саныыбын. Ол турдахпына төбөбөр матыып кэлэн түһэр, ону строй быыһыгар туран ыллаан көрөбүн, "Дойдубар Суолаҕа, эдьиийбэр Таанньаҕа", туох эрэ тахсыах курдук диэммин испэр үөрэ санаатым, уонна матыыппын умнубат баҕаттан хос-хос өйбөр ыллаа да ыллаа буолабын. Хата развод кэннэ "Час солдатского письма" оҥордулар. Мин онно олорон ырыабын толору суруйарга сананным, хата мин дьолбор хоһоонум бэрт чэпчэкитик төрөөн таҕыста. Аны туран хоһооммун суруйбут кумааҕыбын сүтэрэн кэбиһиэм диэммин, дойдубар почтанан эдьиийбэр ыытан кэбистим. Аҕыйах ыйынан эдьиийбиттэн сурук турабын. Хоһооммун ааҕан үөрбүт, матыыбын дойдубар тиийдэхпинэ ыллаан иһитиннэриэм дии санаатым. Биир сыл ааста, дойдубар эргиллэн кэллим, үлэ-хамнас, дьиэ-уот аймалҕаныгар киирэн ырыам дьыалата тохтоон хаалла. 2020 сыллаахха эдьиийим бэлиэ сааһыгар диэн, кэргэним Дария сүбэтинэн (уонна бириэмэ көстөн) доҕорбунаан Иван Наумовтыын көмөлөөн ырыаны оҥорон, уһулан таһаарбыппыт. Саха араадьыйатыгар биэрдим уонна Эдьиийбэр эрийэн "Эдьиий, араадьыйаҕын холбоо, саҥа ырыам сүрэхтэниэ билигин" диэбитим, ону эдьиийим "Сөп" диэбитэ. Кини туһунан ырыа буоларын эппэтэҕим. Эдьиийим наһаа соһуйбут, үөрбүт этэ. Кэлин "Валеко, наһаа үчүгэй ырыа суруйбуккун, баһыыба" диэхтээбитэ. Ырыам, эдьиийим, (СӨ потребкооперациятын туйгуна, Мэҥэ-Хаҥалас Моорук Суолатын бочуоттаах олохтооҕо) Окорокова Татьяна Титовна сырдык кэриэһигэр ананарар. Ырыаны, 89644224677 нүөмэргэ ватсабынан "Суола" диэн суруйан ыыттаххытына утары тута ыытыахпыт. Барыгытыгар барҕа махтал!
