Жеміс-жидек пен көкөніс бағасы өте қымбат әлемдегі 94 елдің рейтингінде Қазақстан 25-орында тұр. Бұл ақпаратқа сенуге болады. Өйткені Үкімет басшысы Әлихан Смайылов сауда министрлігі мен жергілікті әкімдерге әлеуметтік маңызы бар азық-түліктердің бағасын тұрақтандыруды тапсырса да, ел ең көп тұтынатын жеміс-жидек пен көкөніс әлі де шарықтап тұр. Тіпті шетелден импортталатын тауарларды айтпағанда, өз елімізде өсетін өнімдердің де арзандайтын түрі жоқ. Сондықтан қымбатшылықтан қалтасы әбден жұқарған жұрт нағыз мезгілінде бұл көкөністі тек мөлшерлеп қана сатып алуға мәжбүрміз дейді. Базардағы бағаларды аймақтағы әріптестеріміз де көзбен көріп келген еді. АБАЙ НҰРЖАНҰЛЫ, тілші: – Қызылордада сауда үйлерін айтпағанда базардың өзінде көкөніс бағасы әлі күнге шарықтап тұр. Қазір базарларда жұрт ең көп тұтынатын картоп пен сәбіздің келісі 220-250 теңге, пияз - 180, болгар бұрышы 250-300 теңгеден саудаланып жатыр. Бұлар көбіне өзге өңірлерден жеткізілетін өнімдер. Ал бірақ осы облыстың өзінде өсірілетін көкөністер де арзандамаған. АБАЙ НҰРЖАНҰЛЫ, тілші: – Ал саудагерлер қазір жеміс-жидек пен көкөністің нағыз пісетін шағы болса да, өнімдер өте қымбат бағада әкелініп жатқанын айтады. ЖАНАР ҚОЖАНОВА, тілші: – Жеміс-жидек пен көкөністің нағыз піскен шағына қарамастан Ақтөбенің халқы әлі күнге арзан жеміс-жидекке қол жеткізе алмай отыр. Тамыз айының басы болса да, қаладағы сауда орындарында, тіпті бағасын әкімдіктің өзі бақылап отыратын коммуналдық базардың өзінде жеміс-жидектің бағасы сол күйіқымбат. Мәселен шиенің бір келісі 1200теңге болса құлпынайдың келісі 1800-2000 теңгеге дейін барады, жемістің ең қымбаты қарақат болып тұр Саудагерлер оның бір келісін 3000 теңгеден сатып жатыр. Ал мандарин 1500 тг, тек жаңа піскен өріктер сәл арзан. Бір келісі 650 теңгеге сатып алуға болады. Сатушылардың айтуынша, биылғы жылы жеміс- жидектің бағасы арзандамай тұр. Өйткені тауардың өзі өңірге жеткенше қымбат бағада келеді. Сөздерінше жолдың құнын шығару үшін шет елден келетін жемістердің үстіне тағы елу пайыз қосып сатады екен. РУСЛАН ЖАСҰЛАНҰЛЫ, тілші – Ал еліміздің солтүстігінде кейбір жеміс-жидек өнімдердің бағасы керісінше қымбаттап жатыр. Мәселен оңтүстікте өсетін қауын мен қарбыз шілдедегі бағамен салыстырғанда 20 пайызға өскен. Қазір бір келі қауын 650 теңгеге дейін барады. Саудагерлер оны өнім тапшылығымен түсіндіреді. Ал жылда 300-400 теңгеге түсетін жүзімнің бағасы 800, кей жерлерде тіпті мың теңгеге дейін барады. Алмалардың да бағасы қымбат. БАҚЫТ ҰСМАНОВ, сатушы: – Қазір бәрінің бағасы өсіп жатыр ғой. Мысалы баспана қымбат. Көлік те солай. Олар қымбаттаған соң кім осыны арзан сатқысы келеді. НҰРКЕН, сатушы: – Қымбат емес бұның бәрі. Баға бәрі жақсы. Тек теңге құнсыз. Сосын халықта ақша жоқ. РУСЛАН ЖАСҰЛАНҰЛЫ, тілші: – Жергілікті жерде өсетін қызанақ пен қиярдың да арзандай қоймаған. Олардың бағасы үш жүз теңгеден басталып, түр-түріне қарай 800 теңгеге дейін барады. Сатушылар халықтың табысы төмендеген сайын сатып алушылар да азайып барады дейді. АРШАТ ӘДІЛЖАНҚЫЗЫ, тілші: – Елорда базарларында да баға қымбат. Мәселен картоп бағасы 230 теңгеден. Ал, пияз, сәбіз 300-ден болса, қырыққабат 200 теңгеге саудаланып жатыр. Сатушылардың айтуынша, өзіміздің елде өсетін өнімдердің бағасы Нұр-Сұлтанға жеткенше өсіп кетеді. Үстіне қосатын үстемақыны 100 теңгеден асыра алмаймыз. Одан артық қоссақ, халықтың қалтасы көтермейді, сәйкесінше тауарымыз өтпей, шіріп шығынға батамыз дейді. Ал, сауда-саттыққа жауапты министрліктің мәліметінше ең көп өскені пияз бағасы болса, қырыққабат, сәбіз және картоп арзандады дейді. Сондай-ақ, бағаны негізсіз өсіргендерге қатысты тергеу жүргізіліп жатыр екен. ӘЛІШЕР ӨМІРЗАҚ, ҚР Сауда және Интеграция Министрлігінің ресми өкілі: – Жыл басынан бері 132 комплеанс-келісім жасалды. Оның ішінде баға үстемесін 15 проценттен 10 процентке дейін төмендету қарастырылған. Сондай-ақ, анықталған бағаға қатысты тергеу жүргізілу үстінде. Сонымен қатар, өңірлерге келетін болсақ, баға үстемесі 1 айда ӘМАТ бағасының үстемесін көтеруге жол берген облыстар қатарында Қарағанды, Ұлытау және Қостанай облыстары бар. Бұған дейін Үкімет басшысы Әлихан Смайылов сауда министрлігіне өңір әкімдерімен бірлесіп, рұқсат етілген бөлшек сауда үстемесінің сақталуын бақылауды және қабылданып жатқан шаралардың тиімділігін арттыруды тапсырған еді. Сондай-ақ, баға өсуінің салдарымен емес, себептерімен күресетін жаңа тәсілдерді әзірлеу қажет деген болатын. Бізді әлеуметтік желіде оқыңыздар: Youtube - / @informburo31kanal Facebook - / informburo31 Instagram - / informburo31 Vkontakte -
https://vk.com/informburo31 TikTok - www.tiktok.com/@informburo31 WhatsApp Информбюро +7 777 331 31 31 #қымбатшылық #баға
