АСЫЛ АНАЛАР / САФИЯ ХАЙЙАЙҚЫЗЫ - ШЫНАЙЫ ИМАН КЕЛТІРГЕН ЯХУДИ ӘЙЕЛ / #АУДИОКІТАП

Діндар да, иманды мүміндердің анасы Сафия Хаййайқызы, Яғқуб пайғамбардан (аләйһис-сәләм) тараған бәну надир тайпасынан еді. Сонымен қатар оның ата-тегінің Мұсаның (аләйһис-сәләм) ағайыны Һарун ибн Имранға да (аләйһис-сәләм) тікелей қатысы бар еді. Анасының есімі – Бәрра Самаууалқызы. Сафия тұтқынға түскеннен кейін Аллаһ тағаланың оны тура жолға салуымен ол Исламды қабылдап, өзінің жас сеніміне жан-тәнімен беріледі. Исламды қабылдамай тұрып, Аллаһтың елшісіне (оған Алланың игілігі мен сәлемі болсын) дейін Сафия екі рет тұрмысқа шыққан-ды. Алғашқы күйеуінің аты Сәлмә ибн Мишкам, ал екінші күйеуінің есімі Хайбар қамалының иесі Кинана ибн Рабиғ еді. Екі рет тұрмыс құруы да Сафияның тайпасы үшін бейбіт өмірді сақтаудың жолы болады, өйткені сол уақытта яһудилер мен олардың тайпаларының арасында ежелден келе жатқан дұшпандық кеңінен орын алған-ды. Тұтқынға түскен әйелдер Аллаһ елшісінің (оған Алланың игілігі мен сәлемі болсын) азаншысы Біләлдің (Аллаһ оған разы болсын) қарауында еді. Олар жылап, бақырып-шақырып, айқайлап шу шығарумен болғанда, жалғыз Сафия ғана үнсіз мұңайып, ішінен тынатын. Оның мөлдір жанарынан аққан жас та білінер-білінбес-ті. Оның бұл халі Пайғамбарымыздың (оған Алланың игілігі мен сәлемі болсын) көңілін аударады. Аллаһ елшісі (оған Алланың игілігі мен сәлемі болсын) Сафияның жанына таяп келіп, Біләлдан оны босатуын сұрайды. Пайғамбарымызға (оған Алланың игілігі мен сәлемі болсын) Сафияның жүріс-тұрысының қарапайымдылығы, түсінігі мен сабырлылығы ұнайды. Әнәс ибн Мәліктің (Аллаһ оған разы болсын) айтуынша, Аллаһ елшісі (оған Алланың игілігі мен сәлемі болсын) Сафиядан иманға келіп, өзінің әйелі болуға қалай қарайтындығын, келіспесе, бостандыққа жіберетінін айтқанда, ол: «Уа, Аллаһтың елшісі! Әрине, қалаймын, тек егер Аллаһ пен Ислам маған ол үшін ерік берсе. Яһудилікте мен үшін мақсат жоқ. Онда мен үшін әке де, бауыр да қалмады. Маған иман мен күпірдің арасына таңдау тастадың. Мен Исламды сен үйленуге ұсыныс жасамай тұрып-ақ қабылдағанмын. Аллаһ пен Оның елшісі маған бостандыққа шығып, қауымыма оралғанымнан жақсырақ», – деп жауап береді. Үйленгеннен кейін Пайғамбарымыз (оған Алланың игілігі мен сәлемі болсын) оған: – Аллаһ өлтіргенше әкең маған яһудилердің ішіндегі ең қаскөйі болып өткен еді, – дегенде, Сафия: – Уа, Аллаһтың елшісі! Аллаһ кітабында: «Ешкім басқаның күнәсін көтермейді» [«Исра» сүресі, 15-аят.] деген ғой, – дейді. Аллаһ оған разы болсын! Пайғамбарымыз (оған Алланың игілігі мен сәлемі болсын) Мәдинаға қоныс аударғанда, Сафияның әкесі Хаййай ибн Ахтаб Мәдинада болатын. Ол өз тайпасының көсемі еді. Сафия: «Кішкентай кезімде әкемнің немере ағам Ясирмен сөйлесіп жатқанын естідім. Әкем одан: – Жіберілген пайғамбар осы ма? – деп сұрады. Немере ағам: – Иә, – деп жауап берді. – Оны қайдан білдің? – деп сұрады әкем. Ол: – Ишара етілген барлық белгілер сәйкес келеді, – деді. Әкем: – Енді қандай шешімге келдің? – дегенде, ол: – Оған өле-өлгенше қастық қылуға байлам жасадым, – деді. Мен бұлар айтып жатқан кісі пайғамбар болса, неге онда оны жек көреді деп ойладым», – дейді. Осы сәттен бастап Сафияның жүрегінде Аллаһтың елшісіне (оған Алланың игілігі мен сәлемі болсын) деген махаббат оянады. Толығырақ видеодан көре аласыз...