Маңғыстау облысында 7 жыл бұрын пайдалануға берілген мектеп апатты деп танылды

Маңғыстау облысының Шетпе ауылында жеті жыл бұрын пайдалануға берілген мектеп апатты деп танылды. Мыңға жуық оқушы басқа білім ошағына уақытша ауысқан. Бірақ ұл-қыздарды тасымалдайтын автобус жетіспейді. Балалар ескі көліктерге сыймайды дейді ата-аналар. Сондықтан автобус санын көбейтуді сұрап отыр. Ал көліктер мектеп директоры мемлекеттік сатып алу порталында көрсеткен техникалық талапқа сай келе ме? Халық не үшін оқушылардың қауіпсіздігіне алаңдайды? Әріптесім Махаббат Нұржанқызы біліп келді. 1 миллиард теңгеден астам қаржыға салынған ғимарат жаңа оқу жылы басталмай тұрып жабылды. Сондықтан оқушылар ауылдың басқа шетіндегі білім ошақтарына қатынап оқып жүр. Жергілікті тұрғындар мектеп апатты деп танылғалы бері балаларымыздың сабаққа жетуі нағыз азапқа айналды деп ашынады. ЖАДЫРА ОСПАНҒАЛИЕВА, Шетпе ауылының тұрғыны: Автобусқа сыю мүмкін емес, автобустың жайы деген нашар. Енді мына үйдің қасынан кіріп-шығып жүрген балаларымызға қиын болып тұр ана жаққа қатынау деген. Мына мектепті жөнге келтіре ме біздің талабымыз, әлде сала ма. Әйтеуір сол бір жолын қарастырсын. Оған дейін бізге автобусты жеткілікті қылу керек. Расыменде, ұл-қыздар ескі көліктерге әрең сыяды екен. Қыстырылып-қымтырылып, улап-шулап мектепке келеді. Қайтқанда да осы көрініс. Ата-аналар «мыңға жуық балаға 10 автобус аздық етеді» деп отыр. Оған қоса, жүргізуші оқушыларды алысқа түсіріп кетеді дейді. САҒЫНҒАЛИ ЕРКЕТАЕВ, ШЕтпе ауылының тұрғыны: Мына жерден қатынау деген азап. Оған шығып жатқан автобусқа әр ауыл бар мына жерде біреуі ана автобусқа мініп кетеді, ол даладан түсіп қалады. Әркім ол дейтін қазір деген адасқанды ат білісін қазір тіпті айқай-шу, берекетіміз кетіп жатыр. Ал білім ордасы балалар тасымалы үшін мемлекеттік сатып алу порталында конкурс жариялаған. Техникалық сипаттамасында 2016 жылдан кейін шығарылған автобустармен тасымалдау міндетті екені көрсетілген. Қауіпсіздік белдіктері, алғашқы көмек қобдишасы сынды қажетті құралдармен жабдықталуы тиіс деген. Бірақ мектеп директоры бұл талапқа сай келмейтін кәсіпкермен келісімшарт жасапты. НАЗЫМ ЕСБОЛАЕВА, №7 мектеп-лицей директоры: Ол жерден ешкім кім түсіп жатыр, қалай түсіп жатыр, қандай суммамен түсіп жатыр біз көре алмаймыз. Бізге портал жеңімпазды протоколмен шығарып береді. 2016 жылғы деп көрсеттік. Себебі балалардың қауіпсіздігі бірінші орында болғаннан кейін біздер көрсеттік оны, спецификацияда тұр. Біздер автобустың санын көрсеткен жоқпыз. 953 баланы салдық ол жерге. Мектеп басшылығы көпшілікті мазалаған мәселе жыл соңына дейін шешіледі деп сендірді. Ал, бос қалған мектептің жөндеу жұмыстары қашан аяқталатыны әзірге белгісіз. #Информбюро #31арна #БастыЖаңалықтар #Новости #31канал