ДАРХАД НҮҮДЭЛ

Дархадын цэнхэр хотгорт хүйтний эрч чангарч, өдөр ирэх тусам цас лавсана. Хөвсгөл аймгийн Рэнчинлхүмбэ сумын малчид хөлгүй цаснаас урьтаж, даваа гүвээ хаагдахаас өмнө дулаан өвөлжөөгөө зорихоор хайнагийн шардынхаа нуруунд хоол хүнс, гэр орноо ачаалж, мал сүргээ туусаар их нүүдэл хөдөлнө. Нүүдлийн зам бартаа ихтэй, эгц цавчим сарьдгуудаар хүрээлэгдсэн. Цаг агаарын хүнд нөхцөлд хатуу бэрхийг туулах малчдын тэсвэр тэвчээр, малаа хайрлах, малаа уналга эдэлгээнд эдлэх арга ухааны тухай өгүүлнэ. Дархад түмний нүүдлээ дагасан гайхамшигт соёлтой танилцахаас гадна нүүдлийн өмнөх бэлтгэл, нүүдлийн үеийн мал маллагаа, нүүдэлтэй холбогдсон эдлэл хэрэгсэл, соёлын чухал зүйлсийг энэхүү баримтат кинонд тусгасан.