НҰРҒИСА ТІЛЕНДИЕВТІҢ 100 ЖЫЛДЫҒЫНА АРНАЛҒАН "ӨЗ ЕЛІМ" АТТЫ КОНЦЕРТ

НҰРҒИСА ТІЛЕНДИЕВТІҢ 100 ЖЫЛДЫҒЫНА АРНАЛҒАН "ӨЗ ЕЛІМ" АТТЫ КОНЦЕРТ Биыл қазақтың әйгілі композиторы, даңқты дирижер, домбырашы, КСРО халық әртісі, Халық қаһарманы Нұрғиса Тілендиевтің туғанына 100 жыл толды. Қазақтың біртуар перзенті - 1925 жылы 1 сәуір күні Алматы облысы Іле ауданында дүниеге келген. Нұрғиса Тілендиев қазақтың ұлттық өнері мен мәдениетінде өшпес із қалдырды, «Отырар сазы» фольклорлық-этнографиялық оркестрінің негізін қалады. Композитор 400-ге тарта ән мен романс, 50-ден астам драмалық қойылымға, 19 көркем фильмге, 17 мультипликациялық, 14 деректі - хроникалық фильмдерге музыка жазған. Н.Тілендиевтің шығармашылығы ұлттық музыканы жаңа деңгейге көтеріп, қазақ күйінің қайталанбас үнін әлемге танытты. ЮНЕСКО-ның 2025 жылды Нұрғиса Тілендиев жылы деп жариялауы оның дүниежүзілік маңызын айғақтайды. 9 сәуір күні Үржар аудандық мәдениет үйінде Нұрғиса Тілендиевтің 100 жылдығына арналған концерт өтті. Концерттік бағдарламада "Көңіл толқыны" халық аспаптар оркестрі композитордың "Көш керуен", "Бауырлаштарым", "Мұрагер", "Ата толғауы", "Жеңіс салтанаты", "Махамбет" күйлерін орындады. Нұрбол Черубаев "Өз елім", Райгүл Чүкенова "Кел еркем, Алатауыма" , Әліби Қаниев "Көктемді сағындым", "Тарғытай" тобы "Алатау", Қанат пен Гүлмира Сатмұхамбетовтар "Куә бол", "Ғұмыр" тобы "Қайран менің жүрегім", Дана Аймухамбетова "Әке туралы ән", Назерке Тұякпай "Асыл әже" әндерін тамылжыта шырқады. Айбек Тойшыбеков "Ақсақ құлан", Елдар Мәулетов "Аққу" күйлерін және екеуі "Күй тартысты" жоғары деңгейде орындап көрерменді тәнті етті. Зал толы көрермен қауым Нұрғисаның "Құстар" әнін әншілермен бірге шырқады. Күйлерімен, әндерімен жүректерге нұр құйған Нұрғиса Тілендиевтің 100 жылдық мерейтойы құтты болсын.