Алты Алаштың баласы жиналған алқалы жиында Оқу - ағарту вице министрі Ғани Бектайұлы мен Білім басқармасы басшысы Қасымхан Сенғазыұлы ұлағатты ұстаздар қауымын құттықтады! Жиын соңында білікті маман, өз ісінің хас шебері, ҚР мәдениет саласының төсбелгі иегері Гүлмира Жангелдіқызы жетекшілік жасайтын " Айналайын " балалар хоры мен " Жастар үні " тобы " Ұстаздардың ұстазы - Ыбырай ата " атты әнімді ұлағатты ұстаздар қауымы алдында елге тарту етті! Осы айтулы жиында орындалып жатқанына қуанып төбем көкке сәл жетпей қалған жәйім бар. Көңілім толқып, бойымды ерекше бір сезім билеп қуанып қайттым. Өйткені бұл жиынның орны ерекше! Орындаушылардың дауыстарының өзіндік бір ерекшеліктері сондай әнімді әуелетіп, құлпыртып жіберді. Гүлмира Жангелдіқызы шексіз ризашылықпен алғысымды айтамын. Ақ жаулықты асыл анаңыз аман болсын. Деніңізге саулық, отбасыңызға амандық, жұмысыңызға береке, шығармашылығыңызға толағай табыстар тілеймін Алладан. Ұстаз еңбегінің жемісі шәкірті дегендей шәкірттеріңіз алқалы жиында топ жара берсін. Өмірде де, өнерде де жұлдыздарыңыз жарқырай берсін. Игі тілек, құрметпен: Қанат Уәлиұлы
