Тез баюды көздейтіндер - алаяқтардың құрбандары | ⚖️ «Заң үстемдігі» бағдарламасы

⚖️ «Заң үстемдігі» бағдарламасының қонағы – Бағлан Ыдырысов, Астана қаласының қылмыстық істер жөніндегі мамандандырылған ауданаралық сотының судьясы. Бағдарламада судья соңғы жылдары инвестициялық алаяқтық істерінің көбейгенін атап өтті. Кейбір азаматтар өзін кәсіпкер ретінде көрсетіп, халықты сендіріп, миллиондаған теңге көлемінде қаржы жинап алып, кейін алдап кететін жағдайлар жиілеп кеткен. Судьяның айтуынша, мұндай тұлғалар шын мәнінде ешқашан нақты кәсіппен айналыспаған, тек жобалап біліп алып, кәсіпкер бейнесін жасанды түрде қалыптастырады. Қазақстанда инвестициялық алаяқтықтың кең таралған түрі – қаржылық пирамидалар. Қаржы мониторингі агенттігінің мәліметінше, 2024 жылы 24 қаржы пирамидасы жойылып, 2,2 миллиард теңге көлеміндегі криптовалютадағы қылмыстық кірістер бұғатталды. Инвестициялық алаяқтықтың негізгі белгілері: жоғары табыспен қызықтыру, жалған компаниялар құру, қаржылық пирамидалар ұйымдастыру. Тағы бір белгісі, қызметін дәлелдейтін ресми құжаттардың болмауы. Қазақстан Республикасының Қылмыстық кодексінің 190-бабына сәйкес, алаяқтық бойынша 3 жылдан 10 жылға дейін бас бостандығынан айырылу жазасы белгіленген. Судья Бағлан Ыдырысовтың айтуынша, азаматтар қаржылық сауаттылықтарын арттырып, күмәнді жобалардан аулақ болулары қажет. Кез келген инвестициялау алдында компанияның заңдылығын тексеріп, ресми құжаттарды талап ету маңызды. ⚖️ «Заң үстемдігі» бағдарламасы. Бағдарлама жүргізушісі – Нұргүл ҚАРАҒОЙШИНА