Мемлекет басшысы: Латын әліпбиіне көшу – қазақ тілін сақтап қалу үшін жасалып отырған тарихи мәселе

Ұлттық жаңғыру деген ұғымның өзі ұлттық сананың кемелденуін білдіреді. Елбасының «Хабар» арнасы журналистеріне берген сұхбатының негізгі тақырыптарының бірі – «Рухани жаңғыруға» арналған еді. Мемлекет басшысы алдымен экономика, сосын саясат ұстанымын, президенттік басқару жүйесінде өз жемісін бергеніне тоқталып, енді міне рухани жаңғыруға кезек келгенін айтты. Осы бағыттағы алғашқы адым, латын әліпбиіне көшу турасында да пікірін білдірді. Тамыры тереңде жатқан «Туған жер» бағдарламасына тоқталып, «Әлемнің ең үздік 100 кітабы» қазақ тіліне аударылып жатқанын атап өтті. Жаңғыру – жаңа белес. Әуелі үшінші модернизация, ізін ала елдегі саяси реформалар. Экономика, сосын саясат деген бастапқы идеядан ауытқу жоқ. Бірақ екеуінің де рухани жаңғырусыз берешегі көп емес. Алда ұлт санасын жаңарту мұраты тұр. Елбасының рухани жаңғыруға ерекше мән беруі сондықтан. Арнамызға сұхбатында Нұрсұлтан Назарбаев алты бағытта кешенді шаралардың басталғанын айтты. Біріншісі – латын әліпбиіне көшу.