«Тарих тағылымы Сапар Ысқақовпен» жобасының кезекті санында – Кетбұға туралы әңгіме тарқатпақпыз. Қазақ тарихында Кетбұғаның есімі ержүрек батыр, дәулескер күйші, қабырғали би, әділетті хан кеңесшісі ретінде белгілі. Найман тайпасынан шыққан Кетбұғаның «Ақсақ құлан» күйі тарихтан жеткен ұлы мұра. Көптеген тарихи деректерде Кетбұғаның өмір сүрген кезеңі туралы әртүрлі нұсқалар айтылады. Дегенмен оның Шыңғысхан заманында өмір сүргендігі анық. Моңғолдардың әскери жорықтарынан соң, дешті қыпшақ даласына Жошыхан иелік еткен. Осы тұста басқыншылық жорықтарға белсене қатысып, ірі әскери басшылық қызмет жасаған Кетбұға бабамыз. Яғни, моңғол шапқыншылығынан кейін Қыпшақ даласында құрылған жаңа мемлекет – Жошы ұлысының негізін қалаушы ретінде тарихқа енді. Жошы сынды ханның кеңесшісі, ақылман абызы Кетбұға бабамыз дешті қыпшақтың ұлық биі, ел ағасы. Ендеше түбі бір түркіге ортақ Кетбұға бабамыз туралы видеожобамызды көріп, абыз мемлекет қайраткері болған тұлғаның өмірінен қызықты деректерді көре отырыңыздар.
