Миний аав архичин

Аав нь дандаа архи уудаг айл амар тайван, жаргалтай гэр бүл байж чаддаг билүү? Архинд донтсон хүнээс сайхан зан, хайр халамж гардаг билүү? Харин ч гэр бүл, үр хүүхэд нь байнга айдас хүйдэстэй, сэтгэл түгшүүртэй, гэр орон хүйтэн хөндий, хэрүүл маргаан тасардаггүй болдог биздээ? Гэтэл энэ бүхний ард архинд донтсон аав гэр бүлээ хэрхэн зовоож, шаналгаж яваагаа мэдэхгүй донтолтондоо автан хувиа хичээн амьдарсаар байдаг. Эцэст нь сайхан зүйлд хүрсэн түүх хэр олон бол? Алдаагаа ухамсарлаж, архинаас өөрийгөө чөлөөлсөн нэг нь байхад амьдралаа сүйрүүлж орхисон нь ч байдаг. Архинд донтолт хүүхдийн сэтгэлзүйд нөлөөлж, арилгаж болшгүй шарх үлдээдэг байна. Энэ нь тэдний хүн болж төлөвших үед нь муугаар нөлөөлж, зан араншин, ирээдүйн амжилтанд нь ч нөлөөлж болох талтай. Архинд донтсон хүн донтолтоосоо болж өөрийгөө удирдаж чадахгүй зовдог бол, түүний ард байгаа гэр бүл нь тэрнээс ч илүү бие сэтгэлийн зовлон туулдаг гэдгийг олон аавууд, эр нөхрүүд ойлгоосой!