Ж.Жөргенбаев ӘКК жұмысының тиімсіздігі мен азық-түлік қауіпсіздігіне төнген қатерлер жайлы айтты

Қазақстан Республикасы Парламенті Сенатының депутаты Жанболат Жөргенбаев аймақтық экономиканы дамыту және әлеуметтік мәселелерді шешу мақсатында құрылған әлеуметтік-кәсіпкерлік корпорациялардың қызметінің тиімділігіне алаңдаушылық білдірді. «Президент Қасым-Жомарт Тоқаев биылғы Жолдауында: «Кәсіпкерлік корпорациялар көбі коммуналдық мүлікті басқарумен және маңызы төмен жобаларды жүзеге асырумен шектеліп отыр, ал аймақ экономикасына әсері шамалы. Үкімет мұндай корпорацияларды толыққанды даму институтына айналдыруы қажет», – деп атап өтті. Аудандық деңгейде ауыл шаруашылығы өнімдерін өңдейтін кәсіпорындардың жетіспеушілігі, сонымен қатар, әлеуметтік маңызы бар азық-түлік тауарларының бағасын тұрақтандыру тетіктері аса маңызды мәселелердің бірі. Өкінішке орай, бұл бағыттарда нақты нәтижелі іс-шаралар қабылданбай отыр, ал корпорациялар мұндай жобалардан бас тартуға бейім. Осы орайда, Әлеуметтік-кәсіпкерлік корпорациясы қызметінің функционалдық жағынан бытыраңқы бағытын ерекше атап өту қажет», - деді сенатор.