VIDEO
Монгол Улсын хэмжээн дэхь 2015 оны хамгийн том бүтээн байгуулалтыг улсын комисс хүлээн авлаа. Дарханы төмөрлөгийн үйлдвэрээс Төмөртэйн орд руу шууд тавигдсан 34.5 км төмөр замыг 3 сарын хугацаанд хийж гүйцэтгэжээ. Дэлхийн зах зээл дээр төмрийн хүдрийн үнэ огцом унасан энэ цаг мөчид өрсөлдөх чадвараа Монгол Улс хамгаалан үлдэж байна. Төмөртэйн уурхайгаас "Болд Төмөр Ерөө Гол" компанийн Хандгайт өртеө хоорондох 34.5 км төмөр зам ашиглалтанд орж байна. Үүнээс өмнө Хандгайт хүртэл 20 км газарт автомашинаар тээвэрлэн вагонд дамжуулан ачаалдаг байжээ. 230 сая тонн нөөцтэй, төмрийн ордууд дотроос цорын ганцаар стратегийн жагсаалтад багтсан Сэлэнгийн Төмөртэй ордын лицензийг Дарханы төмөрлөгийн үйлдвэр эзэмшдэг. 2011 онд 1 сая 98 мянган тонн хүдэр экспортолж байх үед 1 тонн төмрийн хүдрийн үнэ 137 ам.доллар байсан бол одоогийн байдлаар дэлхийн зах зээл дээр 36 ам.доллар болтол огцом буурчээ. Хямрал төмөрлөгийн салбарынханд цогцолбор барих мөрөөдлийг нь хэсэг хугацаанд хойшлуулсан ч тэд дэд бүтцийн бүтээн байгуулалтаа ийнхүү хийж дуусгажээ. УБТЗ-ын барилгын анги 1 жилийн хугацаанд газар шорооны ажлыг хийсэн бол 3 сарын хугацаанд төмөр замыг амжилттай барьж өглөө. ЯРИА: Л.Пүрэвбаатар Монгол-Оросын хувь нийлүүлсэн нийгэмлэг “УБТЗ”-ын дарга Дарханы төмөрлөгийн үйлдвэр цаашид жилд зургаан сая тонн төмрийн хүдрийг экспортлохоор төлөвлөжээ. “Болд төмөр ерөө гол” компани 8-н сая тонныг борлуулахаар шийдвэрлэсэн нь жилд нийлээд 14 сая тонн болж байна. 36 ам.доллараар борлуулж буй төмрийн хүдрийн тээвэрлэлтийн зардал 18 ам.доллар байгаа нь зардлыг бууруулах чиглэлд санаачлага гаргах ёстой болгож байна. ЯРИА: К.Энхчулуун Дарханы төмөрлөгийн үйлдвэр ХК-ийн үйлдвэрлэл эрхэлсэн дэд захирал Манай улсын төмрийн хүдрийн нийт таамаг нөөц хоёр тэрбум тонн. Баталгаажсан нь 600 сая. Үүний 450 сая нь Дархан, Сэлэнгийн бүс нутагт байна. Тэр дундаа Төмөртэй, Хуст-Уул, Баянгол, Төмөртолгойн бүлэг орд Сэлэнгэ аймгийн хоёр суманд бүрэлдэн тогтжээ. Ердөө хоорондоо 30-40 километрийн зайд орших эдгээр ордыг эдийн засгийн эргэлтэд цогцоор, нэгдсэн бодлоготойгоор ашиглаж чадвал Тавантолгой, Сайншандын аж үйлдвэрийн цогцолбороос ч түрүүлж, эдийн засгийн үр шимийг нь хүртэх бүрэн боломжтойг металлургийн салбарынхан ярьдаг юм. Төмөрлөгийн үйлдвэрийн уул уурхайн металлургийн тесөл 700-аад сая ам.долларын өртөгтэй. Энэ бол төмрийн хүдрээс ган метал бүтээгдэхүүн үйлдвэрлэх, хуурай соронзон болон нойтон баяжуулалтын үйлдвэр барих зэргийг багтаасан томоохон төсөл юм. Төмрийн хүдрээ зарж мөнгө олсоныхоо дараа энэхүү их бүтээн байгуулалтыг Монголчууд хийх юм. 2017 онд Монголчууд анх удаа гангаа дотооддоо үйлдвэрлэн 100 хувь хэрэгцээгээ хангана.
