Алар аңдып, биз акмалап жүрдүк: Ч.Секиев кварталында катталган окшош окуялар элди коркутууда

Нарын облусунун Ак-Талаа районунун Ак-Чий айылындагы жашоочулар өткөн жылдын октябрь айынан бери тоют чөптөрүн өрттөгөн адамды таппай жатышканын аймактык кабарчыга билдиришти. Жергиликтүү тургундардын айтымында, 2022-жылдын октябрь айынан ушул кезге чейин Чиркей Секиев кварталында жашаган 5 жарандын тоют чөбү 6 жолу жана 1 «Жигули» унаасы өрттөнгөн. Тактап айтканда, 7-октябрь күнү Айбек Асаналиевдин чөбү өрттөнүп кетсе, 23-ноябрь күнү Абдрасул Макеевдин, 30-ноябрь күнү кайрадан Айбек Асаналиевдин эл чогултуп берген чөбү экинчи жолу өрттөнүп кеткен. Андан соң, 31-декабрь күнү Момунбек Райымовдун, 2023-жылдын 5-январь күнү Камчыбек Макеевдин чөбү өрттөнсө, ушул эле жылдын 24-январь күнү Айбек Асаналиевдин эшигинин алдында токтоп турган «Жигули» унаасы өрттөнгөн. 13-март күнү ушул эле кварталга чукул жашаган Муратбек Исаков аттуу жарандын тоют чөбү өрттөнүп кеткен. Бул тургундардын баары тоют чөптөр бир убакытта өрттөнгөнүн, буларды бирөөлөр атайылып өрттөп жаткандыгын айтышууда.