Уладзімір Караткевіч. "Зямля пад белымі крыламі". Гісторыя стварэння нарыса.

УЛАДЗІМІР КАРАТКЕВІЧ. "ЗЯМЛЯ ПАД БЕЛЫМІ КРЫЛАМІ". ГІСТОРЫЯ СТВАРЭННЯ НАРЫСА. Нястомны вандроўнік i працаўнік, літаратар, чалавек невычарпальна светлага настрою, які ўмеў смяяцца як дзіця, усёй душой любіць родных людзей, ўсё сэрца аддаваць роднай зямлі і застацца ёй верным да самага канца – такім быў легендарны пісьменнік-рамантык Уладзімір Караткевіч. І творы ствараў такія, як сам: глыбокія, шматгранныя, рамантычныя, прасякнутыя шчырай і адданай любоўю да Беларусі. У нарысе «Зямля пад белымі крыламі» Уладзімір Караткевіч надзвычай падрабязна распавёў пра Беларусь, яе культуру, мову і літаратуру, фальклор і прыроду. Ён здолеў ахапіць беларускую гісторыю ад старажытнасці да 1970-х гадоў. І гэты твор не мог не з’явіцца, бо Караткевіча заўсёды перапаўнялі пачуцці за сваю радзіму і ён быў гатовы расказваць пра яе ўсяму свету, толькі б ведалі, што існуе на планеце такая прыгожая, Богам пацалаваная, зямля пад белымі крыламі – Беларусь, багатая, перш за ўсё, на шчырых, добрых і таленавітых людзей. Гэтай кнігай, як і ўсёй сваёй творчасцю пісьменнік вучыў любіць сваю гісторыю, свой край, вучыў быць адданым сынам сваёй зямлі. І заўсёды зазначаў: “ Варты жалю той, хто не ведае былога дня і таму не можа разабрацца ў сённяшнім і прадбачыць будучы...”. Першы варыянт рукапісу нарыса ад 12 ліпеня 1971 года сёння захоўваецца ў ЦНБ НАН Беларусі ў аддзеле рэдкіх кніг і рукапісаў. А ў кніжным фондзе аддзела зберагаецца выданне “Зямлі пад белымі крыламі”, якое пісьменнік у 1979 годзе падпісаў і падараваў бібліятэцы. Дарэчы, свой асабісты архіў, спачатку ў 1970, а потым у 1981 годзе, пісьменнік сам перадаў ЦНБ НАН Беларусі. І сёння ў бібліятэцы захоўваецца самая вялікая частка дакументальнай спадчыны Уладзіміра Караткевіча. Сайт ЦНБ НАН Беларусі:
Мы ў Facebook:   / csl.by   Бібліятэка ў Instagram:   / cslnasb