Елтаңбаның авторы Жандарбек Мәлібеков «Мемлекеттік Елтаңба және Ұлттық архитектура хақында»

Қазақстан Республикасы Мәдениет және спорт министрлігінің қолдауымен Ұлттық академиялық кітапханасы Мемлекеттік Рәміздерінің бірі Елтаңбаның авторы, сәулетші Жандарбек Мәлібековпен «Мемлекеттік Елтаңба және Ұлттық архитектура хақында» атты онлайн кездесу өтті. Онлайн кездесуде Елтаңбада бейнеленген әрбір символдың сәулеті, ұлттық құндылығы, мемлекеттік рәміздердің жаңа ғасырдағы жетістіктерде алар орны мен ерекшелігі жөнінде кеңінен ақпарат берілді. Мемлекеттік рәміздер – Ту, Елтаңба және Әнұран Қазақстан Республикасының дербестігі мен тәуелсіздігін бейнелейтін және мемлекетіміздің болашағы мен өткені арасындағы сабақтастықты баяндайтын символ іспеттес. Рәміздер – елдің рухын, қаһармандығы мен даналығын асқақтатын ұлттық құндылық болып есептеледі. Еліміздің тұңғыш рәміздері – Ту мен Елтаңба тәуелсіздігіміздің жариялануының дәл 130-шы күні, яғни 1992 жылдың 4 маусымында қабылданды.