Ақмола облысының Шортанды ауылында Бектас Кәрім есімді ерекше суретші тұрады. Оның басқалардан айырмашылығы өнер иесі соңғы бірнеше жылдан бері малдың сүйегінен қолөнер бұйымдарын жасауды бастапты. Айтуынша, Қазақстанда мұндай бастаманы алғашқы болып қолға алған. Себебі басқа мүсіншілер сүйекті толығымен, яғни оны қаз-қалпында бір композицияға арнайды екен. Ал Бектас Кәрім болса, сүйекті ойып, одан түрлі бейнелер жасайды. Қазір суретші аудандық Мәдениет үйінде еңбек етіп жүр. Онда өзінің арнайы сыныбы бар. Сүйектен түйін түюден бөлек, суретші мұнда сахнаны әрлеу жұмыстарына да атсалысады. 30 жылға жуық тәжірибесі бар өнер иесі: «Енді бар білгенімді жастарға үйретіп кетсем», – дейді. Бектас Кәрім, суретші -Шәкіртім бар. Қазір менде 10 шақты бала осында келіп, дәріс алып жүр. Негізгі нәрсе – өз білгеніңді ұрпаққа үйрету. Өзіңнің сүйектен жасаған дүниелерді кім үйренем десе, кім сұраса, соның жолын ұқтырып, көрсетіп, былай-былай істеу жолдарын көрсету керек. Сол басты мақсатымыз.
